Rusiya ABŞ ilə Səudiyyə Ərəbistanında keçirilən danışıqlarda NATO qüvvələrinin alyansın şərq cinahından (Şərqi Avropadan) çıxarılmasını istəyib.

Teleqraf xəbər verir ki, bu barədə “Financial Times” yazır.

Qeyd olunur ki, Avropa paytaxtlarında Tramp administrasiyasının sülh sazişinə razılıq verə biləcəyi ilə bağlı narahatlıq yaranıb.

Rumıniya prezidentinin müşaviri Kristian Diakonesku ABŞ nümayəndə heyətinin Moskvanın istəyini rədd etdiyini bildirib. Bununla belə, nəşr vurğulayır ki, Vaşinqtonun Rusiya lideri Vladimir Putinə bu güzəştə getməyəcəyinə zəmanət yoxdur.

“Anladığım qədər vəziyyət saatdan-saata və ya gündən-günə dəyişə bilər”, - Diakonesku deyib.

Məqalədə bildirilir ki, Putin uzun müddətdir İkinci Dünya Müharibəsinin sonunda ABŞ, Böyük Britaniya və SSRİ-nin əldə etdiyi razılaşmalara uyğun olaraq, Rusiyanın Şərqi Avropada təsir dairəsini bərpa etməyə çalışır.

Rumıniya Hərbi Dəniz Qüvvələrinin keçmiş komandanı və kəşfiyyat zabiti Sandu-Valentin Matey söyləyib ki, Avropa yenidən tarixi yol ayrıcındadır. Onun sözlərinə görə, Avropa möhkəm dayanacaq və təhlükəsizlik sazişlərinin növbəti dəfə pozulmasına imkan verməyəcək.

“İndiyədək Rusiyanın Şərqi Avropanı öz təsir dairəsinə almaq istəyinə ABŞ-nin cavabı “yox” olub. Amma mən əminəm ki, Rusiya davam edəcək. Bu, onların strategiyası, Putin hakimiyyətə gələndən sonra əsas siyasətidir”, - Matey vurğulayıb.