Ermənistan Baş naziri Nikol Paşinyan Mehrini Azərbaycana təhvil verməyə hazırlaşır.

Teleqraf.com xəbər verir ki, bu barədə Ermənistanda nəşr olunan “Past” qəzeti yazır.

“Mehri məsələsi ilə bağlı sənədlərin dərci Paşinyanın yanvarın 31-də böyük mətbuat konfransı öncəsi təsadüfən baş vermədi. Sözsüz ki, bu, məsələni mətbuat konfransında ən çox müzakirə olunan mövzuya çevirmək və Paşinyana həmin gün bu barədə danışmaq üçün platforma vermək üçün nəzərdə tutulmuşdu”, - məqalədə deyilir.

Erməni nəşri iddia edir ki, Paşinyan bu cür gedişlərlə Mehri və dəhlizin təhvil verilməsinə zəmin hazırlayır. Mənbə xatırladır ki, Paşinyan mətbuat konfransında bu barədə uzun-uzadı danışıb.

Xatırladaq ki, Paşinyan ötən həftə mətbuat konfransında Azərbaycanın qərb rayonları ilə Naxçıvan arasında Mehri üzərindən maneəsiz keçidə razı olduqlarını açıqlamışdı. Ermənistan nəşrlərinə görə, maneəsiz keçid anlayışı dəhliz məntiqini ifadə edir. Yəni yol açıldıqda yüklər və sərnişinlər maneəsiz keçəcəklər, Ermənistanın sərhəd və gömrük yoxlamaları ilə üzləşməyəcəklər.