Ermənistan rəhbərliyi Azərbaycanın tələb etdiyi əraziləri tezliklə təhvil verəcək.

Teleqraf.com xəbər verir ki, bu barədə Ermənistanın “Hraparak” qəzeti məlumat yayıb.

“Hakim “Vətəndaş Müqaviləsi” Partiyasının bir çox deputatının fikrincə, Nikol Paşinyan Azərbaycana ərazilərinin təhvil verilməsi prosesini mümkün qədər tez həyata keçirəcək. Onlar bunu Paşinyanın yaxın ətrafından əldə etdikləri məlumatlardan anlayıblar. İki ay əvvəl Təhlükəsizlik Şurasının iclaslarının birində Paşinyan yaxın vaxtlarda 4 kəndi Azərbaycana təhvil verməyə hazırlaşdıqlarına eyham vurub.

Artıq Paşinyan hədələyib ki, təhvil verməsək, müharibə olacaq”, - məlumatda deyilir.

Nəşr yazır ki, dünən Tavuşa iki avtobus hərbi polis göndərilib. Mənbənin iddiasına görə, hərbi polis Azərbaycana qaytarılacaq Yuxarı Əskipara və Aşağı Əskipara kəndlərinin arasında yerləşən Voskeparda yerləşdirilib.

Ermənistan baş naziri martın 18-də Tavuş sakinləri ilə görüşdə sözügedən 4 kəndin – Aşağı Əskipara, Qızılhacılı, Xeyrimli və Bağanıs Ayrımın Azərbaycana təhvil veriləcəyini açıqlayıb. Həmçinin o, sərhədin delimitasiya prosesinin də Tavuşdan başlayacağını vurğulayıb.

Müəllif: Mənsur Rəğbətoğlu