Son vaxtlar Cənubi Qafqazla bağlı bədbin proqnozların səsləndirildiyi müşahidə olunur. Rusiya və Qərb rəqabətinin regiona mənfi təsir edəcəyi, yaxşı şey vəd etmədiyi bildirilir.
Gürcüstanda avropayönlü kəsimin hökumət əleyhinə etirazları, Ermənistan hakimiyyətinin anti-Rusiya mövqeyini gücləndirməsi buna nümunə göstərilir. Həmçinin dekabrın 25-də AZAL-ın təyyarəsinin vurulmasından sonra Bakı-Moskva münasibətlərinin gərginləşməsinə də diqqət çəkilir.

Bəzi ekspertlərin fikrincə, Rusiya Cənubi Qafqazda mövqeyini getdikcə itirdiyinin fərqindədir. O səbəbdən regionda qarışıqlıq sala bilər.

Kremlin bölgə ilə bağlı gələcək planları nələrdir?

Globalinfo.az-a danışan siyasi şərhçi Əli Zülfüqaroğlu bildirib ki, Cənubi Qafqazda geosiyasi maraq toqquşması bölgə üçün başlıca təhdiddir:

“Hazırda Gürcüstan üzərində ciddi təzyiqlər var. Qərb burada keçirilən parlament seçkilərində məğlub olduqdan sonra uzun illər ərzində formalaşdırdığı rıçaqlardan istifadə edərək təxribatlara rəvac verməyə başladı. Xüsusilə eks-prezident Salome Zurabaşvilinin etiraz dalğası formalaşdırmaq və beləliklə də yeni hökuməti devirmək planları baş tutmadı. Həmçinin Avropa İttifaqı (Aİ) tərəfindən Gürcüstana məhdudiyyətlərin tətbiq edilməsi və bir sıra layihələrin maliyyələşdirilməsinin dayandırılması ilə hökuməti xalqın hədəfinə çevirməyə çalışdılar.

Bu proses hazırda davam edir. Amma rəsmi Tbilisi geosiyasi böhrana uyğun davranmağa çalışır və uzaq perspektivə hesablanan siyasi xətt yürüdür. Bu da Qərbin maraqlarına cavab vermir. Ona görə də Gürcüstan üzərində gərginlik hələ davam edəcək”.

Ekspertin sözlərinə görə, hazırda Ermənistan üzərində həm Qərbin, həm də Rusiyanın güclü təzyiqi var:

“Baş nazir Nikol Paşinyan Qərb tərəfindən hakimiyyətə gətirilib, yəni onun diktəsi ilə hərəkət etməyə məcburdur. Digər tərəfdən İrəvan üzərində Moskvanın ciddi təsir imkanları var. Ermənistanın Rusiyadan qaz asılılığı 80 faizdən artıqdır. Eyni zamanda bu ölkənin kənd təsərrüfatı məhsullarının Rusiya bazarlarından başqa alternativi yoxdur.

Kremlin İrəvana hərbi-siyasi təsir imkanları da mövcuddur. Buna görə də Ermənistan Rusiya və Qərb arasında var-gəl etməyə çalışır. Yəni hər iki tərəf İrəvana ciddi təzyiq göstərirlər”.

E.Zülfüqaroğlu bildirib ki, Azərbaycanla bağlı vəziyyət tamamilə fərqlidir:

“Azərbaycan öz torpaqlarını işğaldan azad edib. Müstəqil siyasət yürüdür, güclü hərbi-siyasi və diplomatik mövqelərə malikdir. Xarici siyasətdə ciddi uğurlar əldə edilib. Bakıya qarşı istər müharibə zamanı, istərsə də hazırda davam edən təzyiqlər heç bir nəticə verməyib. Artıq regionda marağı olan qüvvələr çox yaxşı anlayırlar ki, bizimlə təzyiq dilində danışmağın heç bir faydası yoxdur və əks-effekt verir.

Azərbaycan beynəlxalq hüquqa əsaslanır, geosiyasi böhranı mükəmməl dəyərləndirir və güclü diplomatik həmlələrlə istədiyi siyasi kursu həyata keçirir. Ona görə də Cənubi Qafqazda zəif halqa olan Ermənistan vasitəsilə qeyri-stabil vəziyyət yaratmağa və bölgədə öz maraqlarını təmin etməyə çalışırlar. Hesab edirəm ki, bölgədə sabitliyin təmin olunması üçün Azərbaycan güclü aktordur və təhdidləri neytrallaşdırmaq potensialına sahibdir”.