Gürcüstanın Bolqarıstan, Niderland, İtaliya və Litvadakı səfirlərindən sonra Çexiyadakı nümayəndəsi də vəzifəsindən istefa verdiyini açıqlayıb.

Səfirlər bu addıma səbəb kimi Gürcüstan hökumətinin ölkənin Avropaya üzvlük prosesinin 2028-ci ilə qədər təxirə salınması qərarını göstərirlər. İstefa verənlərin isə məhz Avropa İttifaqına üzv dövlətlərdə çalışan nümayəndələr olması diqqət çəkib.

Globalinfo.az-a danışan politoloq Aytən Qurbanova deyib ki, Gürcüstanda baş verən hadisələr Qərbin ssenarisi üzrə mərhələ-mərhələ atılan addımlardır:

“Səfirlərin istefası da bu ssenarinin tərkib hissəsidir. Bütün istiqamətlərdən Gürcü Arzusu – Demokratik Gürcüstan Partiyasına təzyiq göstərərək hakimiyyətin dəyişdirilməsinə cəhd edilir. Aydındır ki, prosesin sadəcə meydanlardan idarə olunması qeyri-mümkündür.

Gürcüstan Qərbin Cənubi Qafqazda, ümumilikdə isə post-sovet məkanında başlıca hədəfidir. Ona görə də, Tbilisidəki təsir dairələrinin tamamilə itirilməsi onlar üçün heç bir halda qəbul edilən yanaşma hesab olunmur. Proseslərin inkişaf xronikası bir daha göstərir ki, Qərbin əsas siyasi mərkəzlərinin, xüsusilə də Fransanın Cənubi Qafqaz siyasətinin əsas hədəfi, uzun illərdir Gürcüstanda yaratmağa çalışdıqları dayaqlarını qorumaq və hakimiyyət dəyişikliyinə nail olmaqdır. Bu ssenarinin ilkin mesajları hələ seçkidən öncə verilmişdi.

Hər bir halda hadisələrin gedişatı onu göstərir ki, hakim Gürcü Arzusu Partiyası qətiyyətli mövqe nümayiş etdirərək bu təhdidləri aradan qaldıra biləcək potensiala və dəstəyə sahibdir”