Fransa və Böyük Britaniya da Ukraynanın Rusiya ərazisinə zərbələr endirməsinə icazə verib.

Globalinfo.az xəbər verir ki, bu iddia ilə “Le Figaro” qəzeti çıxış edib.

Bildirilib ki, Ukrayna bundan sonra Rusiya ərazisini SCALP/Storm Shadow raketləri ilə vura bilər.

Qeyd edək ki, məlumat hələ ki Fransa və Böyük Britaniya rəsmiləri tərəfindən təsdiq olunmayıb.

Xatırladaq ki, ABŞ Prezidenti Co Bayden də Ukraynanın Rusiya ərazisinə ATACMS tipli raketlərdən istifadə etməklə zərbə endirməsinə razılıq verib.

Ekspertlər bildirirlər ki, bu, Ukrayna müharibəsinin miqyasının genişlənəcəyinin anonsu hesab edilə bilər. Belə ki, rəsmi Moskva daha əvvəl Rusiya ərazisinin sözügedən silahlarla vurulmasının ağır nəticələri olacağını bəyan etmişdi. Rusiya prezidenti Vladimir Putin və digər rəsmilər bunun cavabını nüvə silahı ilə verəcəklərini bildiriblər.

Artıq Rusiyada bu qərara reaksiyalar verilib. Rusiya Dövlət Dumasının Beynəlxalq Əlaqələr Komitəsinin rəhbəri Leonid Slutski TASS-a deyib ki, ABŞ-ın Rusiya regionlarının dərinliklərinə endirdiyi raket zərbələri istər-istəməz ciddi eskalasiyaya gətirib çıxaracaq.

Rusiya Xarici İşlər Nazirliyinin rəsmi nümayəndəsi Mariya Zaxarova da məsələyə dair fikirlərini bildirib. O, TASS-a açıqlama verərək deyib ki, Rusiya Prezidenti bu halda müvafiq qərarlar qəbul ediləcəyi ilə bağlı xəbərdarlıq edib.

Mümkündür ki, kollektiv Qərbin Rusiya ilə bağlı bu qərarı ABŞ-ın yeni seçilmiş prezidenti Donald Trampı fakt qarşısında qoymağa hesablanıb. D.Tramp hələ kampaniya dövründə prezident seçilərsə, Ukrayna müharibəsini dayandıracağını, Rusiya ilə danışıqlara başlayacağını demişdi. Görünür, bu, Qərbin aparıcı qüvvələrinin maraqlarına cavab vermədiyi üçün yeni ABŞ administrasiyasına problem yaradılır. Xatırladaq ki, Donald Tramp prezident kimi vəzifəsinə 2025-ci ilin yanvar ayının 20-dən sonra başlayacaq. Qərbin aparıcı liderləri qarşıdakı 2 aylıq vaxtdan “səmərəli” istifadə etmək qərarı verə bilər.