Fransa Ukraynaya kamikadze dronları göndərməklə yanaşı, Ermənistanı da silahlandırır. Prezident Emmanuel Makron hazırkı və keçmiş münaqişə bölgələrində prosesləri gərginləşdirir. Həmçinin Ukraynaya qələbə üçün deyil, hərbi qarşıdurmanın davamı üçün kömək edir.

Ermənistana silah satması, hədiyyə etməsi, siyasi-diplomatik dəstək verməsi aydındır: Türkiyə və Azərbaycana qarşı sintetik Ermənistanı qoymaq, Türk dünyasının iki aparıcı dövlətinin başını qatmaq, Cənubi Qafqazda yenidən münaqişə ocağı yaratmaq. Hələlik bu regionla bağlı istəyinə çata bilmir.

Globalinfo.az-a danışan beynəlxalq münasibətlər üzrə ekspert Əziz Əlibəyli deyib ki, Ermənistanın Fransa tərəfindən silahlandırılması sülh prosesində ciddi problemlər yaratmaqdadır:

“Ermənistanın revanşizm planları Prezident İlham Əliyevin də ciddi etirazına səbəb oldu. Buna görə də o, məsələ ilə bağlı ən yüksək tribunadan açıq mesaj verdi.

Hesab edirəm, Fransanın Cənubi Qafqazda Ermənistan vasitəsilə mövcud olması tezisinə həm də İrəvan-Paris-Tehran üçbucağında baxmaq lazımdır. Bu, İran üzərindən də gələcəkdə baş verə biləcək müxtəlif regional toqquşmalarda Fransanı əsas oyunçu edəcək.

Fransanı regiona gətirən əsas səbəb isə şübhəsiz, Afrikada məğlub olmasıdır. Dünyanın bölüşdürülməsi prosesinin getdiyi mühüm nöqtədə Paris Cənubi Qafqazdan pay qoparmaq istəyir”.