Bir müddət əvvəl Rusiyanın 2024-cü ildə Azərbaycanın Qarabağ bölgəsində baş konsulluq açmaq niyyətində olduğu ilə bağlı məlumatlar yayılmışdı. Rusiya Federasiya Şurasının Beynəlxalq Məsələlər üzrə Komitəsinin başçısı Qriqori Karasin də Azərbaycandan olan həmkarı Səməd Seyidovla görüşü zamanı bənzər fikirlər səsləndirilmişdi.

Rusiya elitasına kifayət qədər yaxın olan hüquq elmləri doktoru, professor İlham Rəhimov “Globalinfo”ya müsahibəsində belə addımın gözlənilmədiyini bildirib.

Bunu səsləndirən Rusiya rəsmilərinin məqsədi nə olub? Bu ideya haradan ortaya çıxıb?

Mövzu ilə bağlı Globalinfo.az-a danışan politoloq Sahil Kərimli deyib ki, Rusiyanın Qarabağda konsulluq açması ilə bağlı səsləndirilən bəyanatlar rus mətbuatı, siyasi dairələrinin təxribatı kimi qiymətləndirmək lazımdır:

“Burada həqiqətə uyğun məlumat yoxdur. Konsulluğun açılmasını şərtləndirən bir çox amil var. Bu amillər hələ tam yetişməyib. Rusiya və ya digər ölkələrin işğaldan azad edilmiş ərazilərimizdə konsulluq açmasına lüzum yoxdur. Bu, Rusiya ictimaiyyətinin antiazərbaycan mövqeyi ilə tanınan bəzi dairələrinin, erməni lobbisinin təsiri altında olan media qurumlarının təxribatçı açıqlamalarıdır. Cənubi Qafqazdakı həssas dönəmdə, sülhün bərqərar olmadığı dönəmdə belə fikirlərin səsləndirilməsi yolverilməzdir. Qətiyyətlə pislənilməlidir”.