Almaniya kəşfiyyatının təhlilinə görə, Rusiya qarşıdakı 5 ildə hərbi gücünü ikiqat artıra və NATO ölkələrinə hücum edə bilər.

Teleqraf.com xəbər verir ki, bu barədə “Business Insider” yazır.

Almaniya kəşfiyyatının hesabatına istinad olunan məlumatda deyilir ki, Rusiya Qərblə fundamental münaqişəyə hazırlaşır, bunu ordunun strukturunun yenidən qurulması, qoşunların yerdəyişməsi və ölkənin qərbində raketlərin yerləşdirilməsi sübut edir.

Alman kəşfiyyatı bu nəticəyə gəlib ki, Rusiyanın 2026-cı ildən etibarən ən azı bəzi NATO ölkələrinə, məsələn, Litva, Latviya, Estoniya (Baltikyanı region) və ya Finlandiyaya hücum edəcəyini artıq istisna etmək olmaz.

Litva xüsusi xidmət orqanlarının illik hesabatında da Rusiyanın NATO ilə qarşıdurmaya hazırlığından bəhs edilir. Litva kəşfiyyatının fikrincə, Rusiyanın bu addımı Ukraynadakı müharibənin gedişi və nəticələrindən asılı olacaq. Bunda isə Qərbin Ukraynaya silah tədarükü böyük rol oynayır.

Mənbə iddia edir ki, NATO da Rusiya ilə mümkün toqquşmaya hazırlaşır. Nəşr onu da yazır ki, qarşıdurma riskinin artması müharibənin qaçılmaz olması demək deyil, bunu “ikinci soyuq müharibə” kimi də qiymətləndirmək olar.

Müəllif: Mənsur Rəğbətoğlu