Macarıstan Baş naziri Viktor Orban ilin sonunda Avropa Birliyi liderlərinin sammitini pozmaqla hədələdiyi üçün Avropa Şurasının prezidenti Şarl Mişel Çinə səfərini qısaltmalı olub.

Teleqraf.com xəbər verir ki, bu barədə “Politico” məlumat yayıb.

“Mişel növbəti fəaliyyət kursu ilə bağlı liderlərlə danışıqları davam etdirmək üçün Brüsselə qayıdacaq”, - məlumatda deyilir.

Orban dekabrın 4-də ünvanladığı məktubunda Mişeli Ukraynanın üzvlük məsələsini gündəmdən çıxarmağa çağırıb. Macar lider qeyd edib ki, açıq-aşkar konsensusun olmaması qaçılmaz olaraq, AB-nin çağırılan toplantısını uğursuzluğa gətirib çıxaracaq.

Macarıstanın baş naziri Avropa Komissiyasının noyabrda təsdiqlənməsindən sonra Ukraynanın üzvlük danışıqlarının başlanmasına qəti şəkildə qarşı çıxıb və bu ölkəyə 50 milyard avroluq yardıma veto qoymaqla hədələyib.

Nəşr yazır ki, Mişel Pekindən planlaşdırılandan daha tez qayıdacaq, çünki Çin tərəfindən dinlənilməməsi üçün AB liderləri ilə danışmaq üçün Pekində təhlükəsiz telefon xətti yoxdur.

Fransa Prezidenti Emmanuel Makron da Orbanı kompromis tapmağa çalışmaq üçün bu həftənin sonunda Parisdə görüşə dəvət edib.

Mişel keçən həftə Budapeştdə AB sammiti öncəsi gərginliyi azaltmaq üçün Orbanla görüşüb. Bundan sonra Mişel AB arasında birliyin vacibliyini vurğulayıb, onun sözlərinə görə, bu, daimi səylər tələb edir və Avropanın əsas gücüdür.

Müəllif: Mənsur Rəğbətoğlu