Fransanın AFP agentliyinə danışan bir amerikalı rəsmi bildirib ki, Mərkəzi Kəşfiyyat İdarəsi və Mossad rəhbərlərinin başçılıq etdiyi komissiya və ABŞ prezidenti Co Bayden ilə İsrail, Qətər və Misir liderləri arasında çoxsaylı danışıqlar atəşkəs razılaşması ilə nəticələnən "əzablı" beş həftənin xülasəsini təşkil edir. Qətər Misirlə birlikdə İsrail-HƏMAS barışığında mühüm rol oynayıb və Doha vasitəçi mövqeyini gücləndirib.

Publika.az xəbər verir ki, ABŞ-ın HƏMAS-a təsir gücünə malik olan yaxın müttəfiqi Qətər oktyabrın 7-dən sonra Ağ Evlə əlaqə saxlayıb, HƏMAS tərəfindən girov götürülən insanlar haqqında məlumat verib və mübadilə təklifini gündəmə gətirib.

Çoxsaylı görüşlər keçirildi.

Girov məsələsi Baydenin İsrailin baş naziri Benyamin Netanyahu ilə çoxsaylı telefon danışıqlarının əsas mövzusu olub. Bu səylər ilk bəhrəsini oktyabrın 23-də iki Amerika vətəndaşının azad edilməsi ilə verib.

Bir gün sonra HƏMAS öz kanalları vasitəsilə ABŞ-a xəbər göndərib ki, əsirlikdə olan bəzi qadın və uşaqlar Qəzzanı tərk edə bilər, lakin İsrailin qurudan hücumu səbəbindən bu baş vermədi.

Makqurkun səfəri

Ağ Evin Yaxın Şərq və Şimali Afrika üzrə koordinatoru Brett Makqurkun Təl-Əvivə səfəri girovlarla bağlı danışıqlarda dönüş nöqtəsi oldu. Netanyahu noyabrın 14-də keçirilən görüşdən çıxarkən Makqurkun qolundan tutaraq “Bu razılaşma bizə lazımdır” dedi.

Makqurk Qahirədə Misirin kəşfiyyat rəhbəri Abbas Kamil ilə görüşüb. Qəzzadakı HƏMAS liderləri bir gecə öncə Dohada razılaşdırılanların demək olar ki, hamısını qəbul etmişdilər.

"Bu son təklifdir".

Noyabrın 19-da İsrailə qayıdan Makqurk HƏMAS-ın cavabını çatdırıb. İsrailin yüksək rütbəli rəsmiləri ABŞ-ı məlumatlandırıb ki, onlar sazişi yalnız bəzi kiçik dəyişikliklərlə qəbul edirlər.

Qətər razılaşmanın yekun variantını HƏMAS-a göndərib. ABŞ rəsmilərinin məlumatına görə, Qətər lideri HƏMAS-lı həmsöhbətlərinə “Bu son təklifdir” deyib. Növbəti 48 saat ərzində məlum oldu ki, bütün tərəflər razılaşmanı qəbul edəcəklər. Qətər daha əvvəl də girov mübadiləsində mühüm rol oynamışdı.

Nəzrin Cavadzadə