“Azərbaycan XİN rəhbərlərinin Moskvada baş tutan görüşündə məqsədinə çatıb”.

Sfera.az bildirir ki, bunu politoloq Zaur Məmmədov üçtərəfli görüşlə bağlı danışarkən deyib. O, qeyd edib ki, Ermənistan, Rusiya və Azərbaycan XİN başçıları Qarabağın Azərbaycan ərazisi olduğunu və orada yaşayan ermənilərin gələcək hüquqlarının qanunlarımız çərçivəsində həll olunacağı barədə razılığa gəliblər:

“Bu barədə Ermənistan da öhdəlik götürüb. Ermənistan hökuməti Qarabağ erməniləri ilə Bakı arasında dialoqa töhfə verəcəyi haqda öhdəlik götürüb. Bu isə o deməkdir ki, Paşinyan Xankəndidəki separatçıları Azərbaycan hökuməti ilə dialoqa razı salmalıdır. Bundan başqa, azərbaycanlıların və ermənilərin hüquq və təhlükəsizliyinin təmin edilməsi məsələsi qabardılıb. Bu isə o deməkdir ki, doğma yurdlarından qaçqın düşmüş azərbaycanlıların qayıdışı növbəti dəfə müzakirəyə çıxarılıb. Azərbaycan tərəfi bir daha qeyd edib ki, Qarabağdakı ermənilərin hüquq və təhlükəsizliyini Konstitusiyaya uyğun reallaşdıracaq və heç bir əlavə hüquq mezanizmlərindən söhbət getmir”.

Ekspert bildirib ki, rəsmi Bakı görüşdə Laçında keçid-sərhəd məntəqəsinin legitim əsaslarla fəaliyyət göstərdiyini və Qarabağdan erməni terrorçularının çıxarılmasının zəruriliyini qabardıb:

“Azərbaycanın əsas tələbi sülh müqaviləsinin mətnində Qarabağın ərazimiz olmasının həkk edilməsidir. Digər mövzular fikir yayındırır və ikinci dərəcəlidir. Rəsmi Bakının bu və bundan əvvəlki görüşlərdə əldə etdiyi üstünlük ondan xəbər verir ki, sülh prosesinə xələl gətirən separatçıların və onların havadarlarının beynəlxalq hüquqa zidd addımları qarşısında Azərbaycanın manevr imkanları genişlənir. Bakı real nəticələr tələb edir. Müxtəlif tərəflərin prosesin 2025 -ci ilə qədər uzatmaq cəhdləri isə region üçün mümkün eskalasiya deməkdir”.

Qeyd edək ki, dünən Moskvada Rusiya, Azərbaycan və Ermənistan xarici işlər nazirlərinin üçtərəfli görüşü keçirilib.

Günay Rəsulqızı