Türkiyə Prezidenti Rəcəb Tayyib Ərdoğanın Azərbaycan və Ermənistanın sülh prosesində nəhayət yekun qərar verməsi ilə bağlı mövqeyi olduqca önəmlidir. Sözsüz ki, bu kimi açıqlamaların prosesə kifayət qədər ciddi təsiri var. Türkiyə kimi bir dövlətin bölgədə sərgilədiyi davranışlar çox vacibdir.

Bunu Teleqraf.com-a Böyük Quruluş Partiyasının sədri, Milli Məclisin deputatı Fazil Mustafa deyib.

Onun fikrincə, Türkiyə bu məsələdə konkret addımları atmağı düşünürsə, bu, Azərbaycanın arzuladığı bir mövqenin ifadəsidir:

“Əradoğanın rus sülhməramlılarının 2025-ci ildə Qarabağdan çıxması ilə bağlı vermiş olduğu açıqlama əslində onlar üçün xəbərdarlıqdır.

Çünki sülhməramlıların burada sanki heç nə olmamış kimi, müstəqil davranmalarının yeri yoxdur”.

Partiya sədrinə görə, rus sülhməramlıları ya sülhü təmin etməli, ya da bölgədən çəkilib getməlidir:

“Ona görə də bu kimi məsələləri nəzərə alaraq qardaş Türkiyə prezidentinin mövqeyinə çox ciddi açıqlama kimi baxılmalıdır. Bunun da sözsüz ki, təsiri olacaq”.

Fazil Mustafanın fikrincə, Ermənistana edilən xəbərdarlıq isə onların başqa havadarlar axtarmaqla prosesin həllini yubatmağın mümkünsüzlüyü ilə bağlıdır:

“Türkiyə istənilən halda bu qaydalardan kənara çıxmağın qarşılığı olaraq özünün sərt üzünü göstərəcək”.

Müəllif: Tapdıq Qurbanlı