Xəbər verdiyimiz kimi, baş separatçı Araik Arutunyan bildirib ki, Bakı ilə dialoqa hazırdırlar. Amma o, ABŞ-ın yox, Rusiyanın vasitəçiliyi ilə danışıq aparmaq istədiklərini deyib. Azərbaycan isə separatçılarla yox, erməni ictimaiyyyəti ilə danışıq aparacağını lap əvvəldən bəyan edib. Araikin "danışığa hazırıq" deməkdə məqsədi nədir?

Ehtiyatda olan türkiyəli general Yücel Karauz mövzu ilə bağlı Publika.az-a açıqlamasında bildirib ki, Qarabağ Araik Arutunyanla müzakirə ediləcək məsələ deyil:

“Rəsmi Bakı Qarabağda baş verənləri Ermənistan dövləti ilə edir, Araiklə yox. Həmçinin, əli qanlı qatillə hər hansısa dialoq müzakirə mövzusu deyil. Separatçının hərəkətləri planlaşdırılmış addımdır. Bütün bunlar da Ermənistanda bir çox maraqlı qrupun olmasından irəli gəlir. Hər bir qrupun da ümidi fərqli ölkədir”.

Türkiyəli general vurğulayıb ki, Paşinyanın Qərb yönümlü siyasəti Araiki ümüdsüzlüyə qərq edib:
“Separatçı isə məsələdən çıxış yolu kimi dialoqların ABŞ-la yox, Rusiyanın vasitəçiliyi ilə olmasını istəyir. Rəsmi Bakı, əlbəttə ki, bu quyuya düşməyəcək. Araik Azərbaycanla danışacaq səviyyədə deyil. Həm də Araiklə olan danışıqlarda sülhdən söhbət gedə bilməz. Əslində bütün bunlar Ermənistanın nə qədər çarəsiz olduğunu bəlli edir”.

Aysel Şahmar