Hollandiya Çini əsas çip istehsalı avadanlıqlarından məhrum etmək üçün nəzərdə tutulmuş qabaqcıl yarımkeçirici texnologiyaya yeni ixrac məhdudiyyətləri elan edib.

Publika.az xəbər verir ki, bu barədə CNBC telekanalı ölkə hökumətinə istinadən məlumat yayıb.

Hollandiya müasir çiplərin istehsalı üçün lazım olan avadanlıqları istehsal edən yarımkeçiricilər sektorunun aparıcı şirkətlərindən biri olan ASML şirkətinin vətənidir. Birləşmiş Ştatlar uzun müddətdir ki, ölkəyə təzyiq göstərir və ölkəni Çinlə ticarət müharibəsinə qoşulmağa razı salır, çünki ASML-nin bütün dünyada yarımkeçiricilərin inkişafı və istehsalında mühüm rolu var. Artıq qabaqcıl avadanlıqların müəyyən siyahısının xaricə çatdırılması üçün şirkətlər lisenziyaya müraciət etməli olacaqlar, qaydalarda dəyişikliklər sentyabrın 1-dən qüvvəyə minəcək.

Yeni qanun ixrac məhdudiyyətləri üçün hər hansı konkret ölkəni göstərmir və ASML məhsullarına da toxunmur. Hollandiya hökuməti bildirib ki, bu qaydalar potensial hərbi tətbiqlərə malik ola biləcək “mütərəqqi yarımkeçiricilərin inkişafı və istehsalı üçün bir sıra çox xüsusi texnologiyalara” şamil edilir.

“Biz bu addımı milli təhlükəsizlik baxımından atdıq. Bundan təsirlənən şirkətlər onları nəyin gözləyəcəyini bilməsi vacibdir. Bu, onlara yeni qaydalara uyğunlaşmaq üçün lazım olan vaxt verəcək”, - ölkənin ticarət naziri Lizi Şraynmaxer bildirib.

ASML qanun qüvvəyə minməzdən əvvəl ixrac lisenziyaları tələb etməyə başlaya biləcəyini və hökumətin hər bir müraciəti ayrı-ayrılıqda nəzərdən keçirəcəyini söyləyib. Şirkət elan edilmiş tədbirlərin bu il onun maliyyə nəticələrinə əhəmiyyətli təsir göstərəcəyini gözləmir.

Aytən Məftun