Xəbər verdiyimiz kimi, aprelin 23-də Azərbaycan Respublikası Dövlət Sərhəd Xidmətinin bölmələri tərəfindən ölkəmizin suveren ərazilərində, Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsi qurulub.

Laçın yolunda qurulan nəzarət-keçid məntəqəsinin tarixi və siyasi əhəmiyyəti barədə Publika.az-a danışan Türkiyənin Azərbaycandakı səfirliyinin keçmiş hərbi attaşesi, istefada olan general-mayor Yücel Karauz bildirib ki, bu, mühüm addım olmaqla yanaşı, həm də ermənilərə strateji cavabdır:

“Ermənistan tərəfi Laçın-Xankəndi yolundan üçtərəfli bəyanata zidd olaraq qanunsuz məqsədlər üçün istifadə edirdi. Buna görə də sərhəddə - yolun başlanğıcında nəzarətin təmin edilməsi məqsədilə müvafiq tədbirlər həyata keçirildi. Yeni yaradılan nəzarət-keçid məntəqəsinin tarixi, siyasi və strateji əhəmiyyəti var. Bu, Azərbaycanın müstəqillik əldə etdiyi dövrdə olduğu kimi, yəni ərazi bütövlüyü baxımından xüsusi əhəmiyyət daşıyır. Siyasi olaraq əhəmiyyəti ondan ibarətdir ki, Azərbaycan regionda necə güclü dövlət olduğunu, öz torpaqları üzərində hökmranlığını, ərazi bütövlüyünü bərpa etmək əzmini nümayiş etdirir. Azərbaycan üçtərəfli razılaşmanın imzalandığı gündən, yəni otuz aydır münasibətlərin normallaşması və sülhün əldə olunması üçün əlindən gələni edir. Ancaq Bakının sülh çabasına otuz ay müddətində nə Ermənistan tərəfi, nə də Rusiya sülhməramlı qüvvələri qarşı çıxıblar, müxtəlif yollarla əngəl törədiblər. Bakının uzun müddətdir irəli sürdüyü tələbi özü təmin etməsi tarixi hadisədir, 44 günlük müharibədə qazanılan zəfər nədirsə, Laçın yolunun nəzarətə götürülməsi də o qədər mühümdür. Çünki müstəqil bir ölkə olaraq Azərbaycan azad etdiyi ərazilərə torpaq bütünlüyü çərçivəsində tam nəzarəti təmin edəcək”.

General qeyd edib ki, Qarabağdakı erməni əhalisi hər iki istiqamətə hərəkət etmək üçün Azərbaycan postundan keçəcək. Bu isə onları reinteqrasiya prosesinə qoşulmağa, vətəndaşlığı qəbul etməyə sövq edəcək əsas amillərdən biridir:

“Nəzarət məntəqəsinin sayəsində Azərbaycan torpaqlarında yaşayan ermənilərin tam nəzarəti təmin olunacaq. Onlar ya reallıqla barışıb Bakının nəzarəti altında, Azərbaycan pasportuna sahib olaraq yaşamalıdırlar, ya da istədikləri yerə gedə bilərlər. Bu, onların seçimidir. Hesab edirəm ki, keçid məntəqəsinin qurulması Qarabağdakı ermənilərin Azərbaycana inteqrasiyasını sürətləndirəcək. Əslində, düşünürəm ki, Qarabağda yaşayan ermənilərin əksəriyyəti Azərbaycan vətəndaşı olmaq, Azərbaycan dövlətinin nəzarətində yaşamaq istəyirlər. Amma Ermənistandakı əliqanlı qatillər, onların arxasında duran qüvvələr bu insanlara psixoloji, siyasi, iqtisadi təzyiq göstərirlər”.

Y.Karauz vurğulayıb ki, Azərbaycan nəzarət-keçid məntəqəsini öz suveren ərazisində qurub. Onun sözlərinə görə, buna baxmayaraq ermənilər beynəlxalq qurumlara şikayət etməyə başlayıblar, lakin bunun heç bir əhəmiyyəti yoxdur:

“Ermənilərin beynəlxalq təşkilatlara etdikləri şikayətin heç bir önəmi yoxdur. Çünki ora Azərbaycan torpağıdır. Qarabağın Azərbaycana aid olması, eyni zamanda Azərbaycanın ərazi bütövlüyü ilə bağlı BMT-nin bir neçə qətnaməsi var. Hər bir ölkə beynəlxalq hüquq çərçivəsində öz torpaqları üzərində tam hökmranlıq və nəzarət etmək haqqına sahibdir. Bu gün Fransanın, ABŞ-ın və ya başqa hansısa bir ölkənin öz ərazisi daxilində vətəndaşı olmayan, beynəlxalq hüquq çərçivəsində hansısa statusu belə olmayan şəxsləri yoxlamadığını düşünmək belə olmur”.