Beynəlxalq aləm Ankaradakı prosesləri anbaan izləyir. Dünyanın hər yerindən bir çox nəşr və televiziya seçkilərlə bağlı diqqətini Türkiyəyə yönəldib. “2023-cü ilin ən mühüm seçkisi”ni dəyərləndirən “Politico”, seçkinin dünya səhnəsində mühüm nəticələri olacağını yazıb. ABŞ-ın nüfuzlu qəzetlərindən olan “New York Times”da da diqqətçəkən təhlil yer alıb.

Publika.az xəbər verir ki, “Politico” “2023-cü ilin ən əhəmiyyətli seçkisi: Türkiyə” başlıqlı təhlil dərc edib.

“Gələn ay keçiriləcək seçkilərin Türkiyə Prezidenti Rəcəb Tayyib Ərdoğan üçün böyük tarixi əhəmiyyətə malik olduğunu” yazan “Politico”, seçkinin dünya səhnəsində mühüm nəticələrinin olacağını vurğulayıb. Seçkilərin son dövrün ən mübahisəli mübarizələrdən biri olacağının gözlənildiyini ifadə edən nəşr “Seçkilər Avropa və Yaxın Şərqdə təhlükəsizliyə ciddi təzyiq göstərəcək”, - deyə qeyd edib.

“Kimin seçiləcəyi Türkiyənin NATO ittifaqındakı rolunu; ABŞ, Aİ və Rusiya ilə əlaqələri; immiqrasiya siyasətini; Ukrayna müharibəsində Ankaranın rolunu və Şərqi Aralıq dənizindəki gərginliyi necə idarə edəcəyini müəyyən edəcək”, - “Politico” yazır.

ABŞ-ın nüfuzlu qəzetlərindən olan “The New York Times” (NYT) seçkilərlə bağlı qiymətləndirmələr aparıb.

“Mayın 14-də keçiriləcək prezident və parlament seçkiləri dünyanın 20 ən böyük iqtisadiyyatından biri və ABŞ-ın NATO müttəfiqi olan Türkiyəni böyük ölçüdə yenidən formalaşdıra bilər”, - nəşr vurğulayıb.

NYT hesabatında Kılıçdaroğlunun 2010-cu ildən bəri ən böyük müxalifət partiyası olan Cümhuriyyət Xalq Partiyasının (CHP) lideri olduğunu ifadə edib: “Ərdoğan və hakim Ədalət və İnkişaf Partiyası tərəfindən müntəzəm olaraq seçkilərdə məğlub edilir. 2009-cu ildə Kılıçdaroğlu Türkiyənin ən böyük şəhəri və iqtisadi mərkəzi olan İstanbul bələdiyyə başqanlığı mübarizəsində də məğlub oldu. Partiyasının namizədləri 2014-cü ildə İstanbulda, 2014-cü və 2018-ci illərdə isə Ərdoğana qarşı keçirilən prezidentlik mübarizəsində də məğlub olublar”.

NYT CHP-nin 2011-ci ildən bəri dörd seçkidə parlamentdəki yerlərini əhəmiyyətli dərəcədə artıra bilmədiyini yazıb: “CHP iki dəfə də Ərdoğanın səlahiyyətlərini genişləndirən referendumların qarşısını ala bilmədi”.