Azərbaycan Premyer Liqasının 26-cı turu çərçivəsində "Qarabağ"la çətin səfər matçına hazırlaşan "Səbail"in heyətində ciddi itkilər var.
Bayıl təmsilçisinin baş məşqçisi Şahin Diniyevin Fanat.Az-a verdiyi məlumata görə, komandanın 4 futbolçusu qarşıdakı matçda iştirak etməyəcək.
Qustavo de Fransa "Sumqayıt" ilə oyunda qırmızı vərəqə aldığı üçün liderlə görüşdə oynamayacaq. İntizam Komitəsi braziliyalı müdafiəçini bir oyunluq cəzalandırıb.
Ağabala Ramazanov da cəza səbəbindən "Qarabağ"a qarşı oynamayacaq. Hücumçu ötən tur aldığı sarı vərəqə səbəbindən cəzalı duruma düşüb. Bu, onun cari mövsümdə aldığı 4-cü sarı vərəqə olub.
Bundan başqa, "Səbail"in iki zədəli futbolçusu matçın iştirakçısı olmayacaq. Belə ki, Franko Mazurek və Rahid Əmirquliyev oyuna hazır deyil.