Avropa Parlamenti Rusiyanın Ukraynaya qarşı cinayətlərini araşdırmaq üçün xüsusi beynəlxalq tribunalın yaradılmasını tələb edən qətnamənin lehinə səs verib.

Publika.az xəbər verir ki, bu barədə AP-nin saytında bildirilir.

Qeyd olunub ki, 427 deputat sənədin lehinə, 19-u əleyhinə səs verib, 33-ü isə bitərəf qalıb.

Qərara görə, Avropa İttifaqı və onun üzvləri Rusiyanın siyasi və hərbi rəhbərliyinin Ukraynaya qarşı törətdiyi təcavüz cinayətini təqib etmək üçün xüsusi beynəlxalq tribunal yaratmağa çalışmalıdır.

“Xüsusi tribunal - nasist liderlərinin mühakimə olunduğu İkinci Dünya Müharibəsindən sonra Nürnberq məhkəməsinə bənzər - Ukrayna və beynəlxalq ictimaiyyətlə sıx əməkdaşlıqda, daha yaxşı olar ki, BMT vasitəsilə yaradılmalıdır”, - Avropa Parlamenti qərara alıb.

Qeyd olunur ki, belə tribunallar BMT Təhlükəsizlik Şurasının qərarı ilə keçmiş Yuqoslaviya və Ruandada hərbi cinayətlərdə təqsirli olan şəxslərin mühakimə olunması üçün yaradılıb.

Təşəbbüs müəlliflərinin əsas vəzifəsi məhkəməyə, Vladimir Putini, Rusiya Federasiyasının siyasi və hərbi rəhbərliyini, habelə Belarus prezidenti Aleksandr Lukaşenkonu və ölkə rəhbərliyini təqib etmək yurisdiksiyasına malik olmaq hüququ vermək üçün ümumi hüquqi əsaslandırılmış yol tapmaqdır.