Yeni ildə Azərbaycanda un ucuzlaşıb.

“Karat Holding” MMC bir kisə “Karmen” ununun qiymətini 40,70 manatdan 37,95 manata endirib və bunu 2022-ci ilin Azərbaycan un sənayesi üçün çətin il olması ilə əsaslandırıb.

Xatırladaq ki, 2022-ci ildə ölkəmizdə çörəyin və unun qiyməti iki dəfə artıb. Yanvar ayında 50 kq-lıq bir kisə unun topdansatış qiyməti - 35,9 manat, 500 qr-lıq ənənəvi (dairəvi) çörəyin pərakəndə satış qiyməti - 50 qəpik, 650 qr-lıq ənənəvi (dairəvi) çörəyin pərakəndə satış qiyməti - 65 qəpik müəyyən edilib.

Yola saldığımız ilin avqustunda isə 50 kq-lıq bir kisə unun ən yüksək qiymət həddi - 40,70 manat, 500 qr-lıq ənənəvi (dairəvi) çörəyin pərakəndə satış qiyməti - 55 qəpik, 600 qr-lıq çörəyin pərakəndə satış qiyməti - 65 qəpik, 650 qr-lıq çörəyin pərakəndə satış qiyməti - 70 qəpik təşkil edib.

Lakin ayrı-ayrı vaxtlarda çörəyin qiymətinə təsir etməsə də, unun qiymətində müəyyən ucuzlaşma qeydə alınıb. Noyabr ayında da əvvəlki aylara nisbətən 50 kq-lıq unun qiymətində 1 manata yaxın ucuzlaşma müşahidə olunmuşdu.Hazırda 50 kq-lıq bir kisə un əvvəlkindən ucuz satılsa da, çörəyin qiyməti olduğu kimi qalır.

Bəs indiki halda unun qiymətindəki ucuzlaşma çörəyin qiymətinə təsir edəcəkmi, yeni ildə çörəyin qiymətində enmə ola bilərmi?

Bu barədə çörək zavodlarının nümayəndələrinin Cebhe.info-ya açıqlamalarından çörəyin qiyməti ilə bağlı müsbət dəyişikliyin gözlənilmədiyi aydın olub.

Bununla bağlı saytımıza danışan "Nömrə1” Gilan çörək Zavodunun satış müdiri Rahim Nizaməddinov mövcud durumun dəyişmədiyini deyib:

"Bizə heç bir məlumat daxil olmayıb. Hələlik yeni qiymət haqqında bilgisizik".

"Binə” çörək zavodunun direktoru Seymur Babayev də yeni qiymətdən xəbərdar olmadıqlarını, bir müddətlik un ehtiyatlarını köhnə qiymətlə aldıqlarını qeyd edib.

"Nur” çörək zavodunun direktoru Söhrab Cabbarov hələlik un ehtiyatlarının olduqlarını bildirib:

"Biz, ümumiyyətlə, "Karmen" unu almırıq. Bütün onların qiyməti eyni deyil, keyfiyyətinə görə qiymət fərqi var. Rəsmi iş günləri olmadığı və yeni un almadığımız üçün qiymətlərin necə olduğunu bilmirik. Hazırda o qiymətə un almamışıq, ehtiyatda olan undan istifadə edirik".

Zavod direktoru hesab edir ki, yalnız unun qiyməti bir il öncəki qiymətlə eyni olarsa, çörək ucuzlaşar:

"Ümumiyyətlə, bu çox cüzi təsir edir. Çörəyin qiymətini digər ərzaqlar kimi bir qəpik aşağı salmaq mümkün deyil. Unun qiyməti əvvəlki qədər, yəni 35-36 manat olarsa, çörəyin də qiyməti düşəcək. Unun kisəsi 36 manata olanda biz ziyana işləyirdik, amma dözürdük. Çörəyin qiyməti dövlət tərəfindən tənzimlənir".