Rusiyanın oktyabrın 29-da çıxmasından sonra “Taxıl sazişi” de-fakto davam edir, çünki Rusiyanın müqavilələrdən çıxması onların bloklandığı anlamına gəlmir.

Publika.az xəbər verir ki, bu barədə telemarafonun efirində Ukraynanın Türkiyədəki səfiri Vasil Bodnar məlumat verib.

"Onlar sadəcə taxıl sövdələşməsində iştirak etməyi dayandırırlar, bu o demək deyil ki, bloklanıb. Bu vəziyyəti nəzərə alan BMT və Türkiyə tərəfi yoxlamanın Ukrayna və Rusiya tərəflərinin iştirakı olmadan müstəqil şəkildə aparılmasını təklif edib. İndi reyddə olan gəmilər ikitərəfli tərkibdə yoxlanılır. Biz bununla razılaşdıq, sadəcə olaraq Rusiya tərəfini məlumatlandırdıq", - deyə Bodnar bildirib.

Onun sözlərinə görə, Rusiya taxıl müqaviləsini pozmaq üçün səbəb axtarmaqda davam edəcək.

"Biz görürük ki, dünya ictimaiyyəti bundan təsirlənməyib. Əsas paytaxtlardan gələn bütün bəyanatlar Rusiyanı şantajdan əl çəkməyə çağırır. İndi yoxlama davam edir. De-fakto razılaşma qüvvədədir", - diplomat əlavə edib.

O vurğulayıb ki, Ukrayna BMT və Türkiyə ilə müqavilə bağlayıb, ona görə də indiki halda hüquqi baxımdan onun icrasında fasilə yoxdur.

Xatırladaq ki, oktyabrın 29-da Rusiya guya “Ukraynanın PUA-ların köməyi ilə Qara dəniz donanmasının gəmilərinə hücumu” səbəbindən “taxıl sazişi”ndən çıxdığını elan etmişdi .

Bu gün, oktyabrın 31- də Rusiyanın “taxıl dəhlizi”nin işini pozmağa cəhd etməsinə baxmayaraq, taxıl daşıyan 12 gəmi Odessa limanlarını tərk edib.