Belarus Ukraynada müharibəyə qoşulmaq barədə Rusiyanın təklifini qəbul edib.

Artıq bununla bağlı hazırlıq işlərinə başlanıldığı bildirilir.

Bu barədə Belarus Prezidenti Aleksandr Lukaşenko açıqlama verib. Lukoşenko Putinlə Rusiya-Belarus İttifaq dövlətinin regional qrupunun yerləşdirilməsi barədə razılığa gəldiyini açıqlayıb.

“İttifaq dövlətinin qərb sərhədlərində vəziyyətin gərginləşməsi ilə əlaqədar biz Rusiya Federasiyası və Belarus Respublikasının regional qrupunun yerləşdirilməsinə razılaşdıq. Hamısı sənədlərimizə uyğundur. Təhdid hazırkı səviyyəyə çatarsa, biz İttifaq Dövləti qruplaşmasından istifadə etməyə başlayarıq. Bu qrupun əsasını Belarus Respublikasının ordusu, silahlı qüvvələri təşkil edir”.

Prezident Lukaşenko Ukraynın Belarusa qarşı hərbi müdaxilə etməyə hazırlaşdığını bildirib.

O, hər hansı hücum olacağı təqdirdə, Ukraynaya qarşı sərt cavab tədbirlərinin görüləcəyi barədə xəbərdarlıq edib. Əslində, Aleksandr Lukaşenkonun sözügedən açıqlaması “İttifaq ordusu”nun Belarus ərazisindən Ukraynaya hücum əməliyyatının anonsu hesab edilir. Əgər Belarus Ordusu Rusiyaya dəstək məqsədilə müharibəyə başlayarsa, bu Ukraynaya qarşı ikinci cəbhənin açıqlması demək ola bilər.

Nəticədə, döyüşlərin Belarus ərazisinə keçməsi ehtimalı var. Ona görə də həmişə ölkəsində sabitlik istəyən Belarus Prezidentin rusiyalı həmkarı Vladimir Putinin təzyiqi qarşısında bu qərara gəlmək məcburiyyətində qaldığı istisna edilmir. Belarusun müharibəyə qoşulması təhlükənin daha geniş miqyas alması ilə nəticələnə bilər. Çünki Belarus Rusiya ilə Polşa və Litva arasında bufer zona rolunu oynayır. Münaqişənin əhatə dairəsinin böyüməsi Litva və Polşanın müdafisəi üçün strateji əhəmiyyətə malik bu təhlükəsizlik zolağının aradan qalxması deməkdir. Üstəlik, Belarus müharibə aparan tərəfə çevrilərsə, Rusiya Kalininqrad vilayətinə quru dəhlizi açmaq planlarını yenidən işə salmaq barədə düşünə bilər. Bu da Litva və Polşa üçün ciddi təhdid yaradır.

Yaranmış vəziyyəti Cebhe.info-ya şərh edən politoloq Teymur Qasımlının sözlərinə görə, Belarusun müharibəyə daxil olması digər dövlətləri də əhatə edəcək.

“Bu isə III Dünya müharibəsinin başlanması demək olar. Ona görə də Aleksandr Lukaşenko Rusiyaya verdiyi vədlərdən yayınacaq. 2020-ci ilin avqust ayında Belarus Prezident seçkilərinin nəticələrinə etiraz edən xalq kütləvi aksiyalar keçirərək Lukaşenkonun istefasını tələb edirdi.

Müxalifətin namizədi Svetlana Tixanovskaya mühacirət etməli oldu. Həmin vaxt Qərb dövlətləri xanım Tixanovskaya dəstək versə də, onu devirmədi. Bundan istifadə edən Prezident Putin Lukaşenkonu tam ələ ala bildi. Lukaşenko Putinin tam təsir dairəsinə düşdü. Rusiya-Ukrayna müharibəsi başlayandan bəri Putin Belarusu bu münaqişəyə qoşmaq istəyir. Hətta Ukrayna ərazisinə bir çox zərbələr Belarus ərazisindən endirilib və bu iki ölkə arasında düşmənçilik toxumu səpilib.

Prezident Lukaşenko Ukraynanın əleyhdarı olsa da, Belarus ordusunu bu müharibəyə qoşmaq istəmir. O, həmişə bildirib ki, biz heç kimlə döyüşmək istəmirik. Ancaq bu yaxınlarda Lukaşenko Abxaziyaya səfər etmişdi. Bununla da Lukaşenko diplomatik manevrlər etməklə müharibəyə qoşulmamağa çalışır. Məncə, Lukaşenko siyasi blef edir. Çünki KTMT-yə üzv olan digər ölkələr müharibədə Rusiyaya dəstəkdən imtina edib. Putinin yeganə ümidi Belarusa qalıb. Əgər Belarusa qoşulsa, Ukraynanın strateji müttəfiq olan Polşa da bu müharibəyə qoşula bilər.

Nəticədə, Rusiya-Ukrayna müharibəsinin yönü dəyişə bilər. Hesab edirəm ki, Lukaşenonun bəyanatı növbəti diplomatik manevrdir. Amma bu da faktdır ki, Ukrayna ərazisi Belarusdan bombalanır. Amma belarusun fəal döyüş əməliyyatlarına qoşulması, Polşanın, Litva və Latviyanın, yəni NATO-nun cəlb edilməsinə səbəb ola bilər. Bu isə III Dünya müharibəsinə gətirib çıxara bilər. Ona görə də Lukaşenkonun açıqlaması onun blefi kimi qiymətləndirilməlidir”.

Müşfiq Abdulla
Cebhe.info