Şimali Koreyanın Yaponiyaya ballistik raket atması bir sıra ölkələrdə narahatlıq yaradıb. Belə ki, Sakit Okeanın üzərinə düşən raketin sınaq məqsədi ilə Şimali Koreyadan Yaponiyanı hədəf alaraq atıldığı məlum olub. Bu isə Yaponiya və Şimali Koreya arasında yeni bir münaqişənin yarana biləcəyi ehtimalını gündəmə gətirib.

Maraqlıdır, bu hadisə nəyə işarədir? Yaponiyanın cavabı nə olacaq? Dünya yeni müharibənin astanasındadır?
Mövzu ilə bağlı Gundem.az-a danışan politoloq Məhəmməd Əsədullazadə bildirib ki, Şimali Koreyanın Yaponiya üzərində hava sahəsini keçməklə Sakit Okeana ballistik raket atması Yaponiyanın ərazi bütövlüyünə qarşı təcavüzkar addımdır:

"Şimali Koreyanın Yaponiya adaları üzərinə sınaq məqsədi ilə atdığı ballistik raketlər uzaq şərqdə təhlükəsizlik sisteminin pozulması deməkdir. Şimali Koreya bu addımla Yaponiyadan, Cənubi Koreyadan, xüsusilə ABŞ-ın formalaşdırdığı hərbi blokdan sığortalanmağa çalışır. Bu nümayiş məhz ABŞ və onun müttəfiqlərinə qarşı bir həmlədir. Şimali Koreya əvvəllər də bu kimi ballistik raket sınaqları həyata keçirib. Lakin bu dəfə birbaşa Yapon adalarının üzərindən sınaq həyata keçirib. Yaponiya tərəfindən bu məsələyə digər şəkildə cavab veriləcəyini düşünmürəm. Fikrimcə, Yaponiya bu məsələyə ritorika, nota ilə cavab verə bilər. Lakin adekvat hərbi addım atılacağını gözləmirəm. Hazırkı geosiyasi vəziyyətdə yeni bir toqquşma olması da mümkündür. Yaponiya çalışacaq ki, Şimali Koreyadan yönələn təhlükələri tam şəkildə neytrallaşdırsın".

Politoloq İlyas Hüseynovun fikrincə, hazırda Rusiya Ukrayna müharibəsi fonunda bütün dünyada müxtəlif proseslər gedir:

"Müxtəlif raket sınaqları həyata keçirilir, yeni model silahların tətbiqi üzərində planlar cızılır və bu xüsusda Şimali Koreya da öz kəskin addımları ilə seçilir. Şimali Koreyanın Yaponiyaya atdığı ballistik raket sınaq məqsədi daşıyır. Buna barədə ABŞ, Cənubi Koreya və Yaponiya raket sistemləri ilə mübarizə sahəsində təlimlərin keçirilməsinə dair qərar verib. Müxtəlif dövrlərdə Şimali Koreyanın uzaq şərqdə təhlükə mənbəyi olması ilə bağlı məlumatlar paylaşılırdı. Amerikanın 45-ci prezidenti Trampın Koreya liderləri arasında görüş təşkil etməsi gərginliyin böyük həcmdə aşağı salınmasına xidmət etmişdi. Lakin hazırda Amerikada hakimiyyətdə demokratlardır və görünür, Bayden administrasiyası ilə Şimali Koreya arasında ziddiyətlər getdikcə böyüyür".

İ. Hüseynov qeyd edib ki, hazırda beynəlxalq münasibətlər sistemində güc faktorunun ön plana çıxması müşahidə olunur:

"Belə olan təqdirdə təbii ki, Şimali Koreya uzaq mənzilli raketlər, ballistik raketlər, nüvə başlıqlarını daşıyan raketləri də sınaqdan keçirir və gərginliyin yaradılması ilə yanaşı, diqqəti də özünə cəlb edir. Şimali Koreyanın da öz planları, məqsədləri var. Mənə elə gəlir ki, təhlükə ocağının yaradılması ehtimalları yüksəkdir.

Düşünürəm ki, bu təhlükələrin qarşısını almaq üçün yeganə çıxış yolu siyasi dialoq və danışıqların həyata keçirilməsidir. Hazırkı ABŞ rəhbəri bu məsələyə diqqət ayırmalıdır. Çünki yeni münaqişə ocaqları yarana bilər. Bu, həm də bəşəriyyət üçün faciə ilə nəticələnə bilər".