Amerikanın istefada olan briqada generalı Mark Arnold ABŞ və NATO-nu Kiyevə Rusiyanın dərinliklərinə zərbələr endirməyə imkan verəcək silahları göndərməyə və onlardan istifadəyə yaşıl işıq yandırmağa çağırıb.

Publika.az xəbər verir ki, onun sözlərinə görə, ABŞ və müttəfiqləri Ukraynanı Rusiya ərazisinə zərbə endirə biləcək silahlarla təmin etməlidir.

"Mən Krımı nəzərdə tutmuram. ABŞ və NATO deyir ki, Rusiya ərazisinə zərbə endirməyin. Amma bu, ağılsızlıqdır" - o əlavə edib.

M.Arnold deyib ki, Ukrayna Silahlı Qüvvələri “Rusiyanın yüzlərlə kilometr dərinliyində” yerləşən hədəflərə hücum etməlidir. Onun fikrincə, NATO öz siyasətinə yenidən baxmalı və Rusiya ərazisinə zərbələrin endirilməsinin qadağan edilməsi ilə bağlı tezislərdən əl çəkməlidir.

General qeyd edib ki, ABŞ Kiyevə HIMARS çoxməqsədli raket sistemləri, Patriot zenit-raket kompleksləri, həmçinin pilotsuz döyüş uçuş aparatları və təyyarələri üçün uzaqmənzilli raketlər verməlidir.

Xatırladaq ki, Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi ABŞ-ın yaxın vaxtlarda Kiyevə döyüş təyyarələri göndərməyəcəyini deyib. Onun sözlərinə görə, Vaşinqton hələlik bu məsələni müzakirə etmir.