Rusiya Prezidenti Vladimir Putin Ukraynaya qarşı işğala başlamaqla neytral İsveç və Finlandiyanı potensial NATO üzvlərinə çevirdi.

Publika.az Teleqraf.com-a istinadla xəbər verir ki, bu barədə İngiltərənin “The Guardian” qəzeti yazıb.

“Ukraynaya təcavüzə başlayanda Putin bununla Qərbə zərbə endirdiyini düşünürdü. Amma bu zərbə “bumeranq effekti” ilə özünə qayıtdı. İki neytral ölkənin NATO üzvünə çevrilməsi Rusiyanın bu dönəmdə ən böyük strateji səhvləri siyahısına əlavə olunacaq”, - məqalədə deyilib.

Qeyd olunub ki, Putinin Ukraynanı təhlükəsizlik imkanlarından məhrum etməyə çalışdığı vəhşi üsul Finlandiya və İsveçdə qəfil düşüncə dəyişikliyinə səbəb olub. Amma nəşr prosesin bitmədiyini və çətin ola biləcəyini də yazıb.

“NATO-ya üzvlüklə bağlı münasibət hələ də sabit deyil, finlər və isveçlilər yenə də yarı neytrallıqlarına qayıda bilərlər. Rusiyanın nüvə təhlükələri seçiciləri yenidən düşünməyə vadar edə bilər. Bununla belə, NATO üzvlüyünün bir çox formaları var”, - məqalədə vurğulanıb.

Finlandiyanın keçmiş baş naziri Aleksandr Stabbın fikrincə, Helsinkinin NATO-ya üzv olmaq istəyi Rusiyanın Ukraynaya təcavüzü nəticəsində yaranan rasional qorxulardan qaynaqlanır. Finlandiyanın sürətlə mövqe dəyişməsi iki ölkə arasında qarşılıqlı hörmət və həssas münasibətdən danışan qonşusu İsveç üçün də nümunə olub.

Nəşr vurğulayıb ki, Finlandiya və İsveçin üzvlük prosesinin çox uzun olması riskli olacaq, çünki Rusiya hibrid müharibənin bütün üsullarından istifadə edərək, onun qarşısını almağa çalışacaq.

Bildirilib ki, fevralın 24-də Rusiya Ukraynanı işğal etməyə başladıqdan sonra Finlandiya seçicilərinin əksəriyyəti və Finlandiya parlamentinin yüzdən çox üzvü ölkənin NATO-ya üzv olmaq qərarını dəstəkləməyə başlayıb.

Nəşrin iddiasına görə, iki ölkənin üzvlüyü məsələsi həllini tapdıqdan sonra Moskva üçün daha pis bu olacaq ki, NATO Baltik dənizində, Rusiya donanmasının yerləşdiyi Kalininqrad vilayətinin düz yanında mövqelərini gücləndirəcək.

Bundan əvvəl Kremlin Helsinkiyə NATO-ya qoşulmamaq barədə xəbərdarlıq etməsindən bir neçə saat sonra, raket sistemləri də daxil olmaqla, ağır silahların Finlandiya ilə sərhədə göndərildiyi üzə çıxıb.