Avropa İttifaqının (Aİ) xarici işlər nazirləri Rusiya ilə viza rejiminin sadələşdirilməsi sazişinin dayandırılması ideyasını dəstəkləyəcəklər.

Publika.az xəbər verir ki, bu barədə “Financial Times” öz mənbələrinə istinadən məlumat yayıb.

Mövzu ilə bağlı danışıqlarda iştirak edən Aİ-nin üç rəsmisi nəşrə bildirib ki, belə bir qərara siyasi dəstək avqustun 30-da Çexiyanın paytaxtında başlayacaq iki günlük görüş zamanı ifadə olunacaq.

Mövcud razılaşmanın dayandırılması ilə bağlı qərar qəbul edilərsə, Aİ vizalarına müraciət edən Rusiya vətəndaşları daha çox sənəd toplamalı olacaq və onlara baxılması daha uzun sürəcək. Bundan əlavə, belə bir ərizənin verilməsinin dəyəri artacaq.