Moskva Vaşinqton və Brüsseli Zaporojjya Atom Elektrik Stansiyasını (ZNPP) atəşə tutmağı dayandırmaq üçün Kiyevə təsir göstərməyə çağırır.

Publika.az xəbər verir ki, bunu Rusiya Xarici İşlər Nazirliyinin sözçüsü Mariya Zaxarova bildirib.

Onun sözlərinə görə, Qərb ölkələri Rusiya Federasiyasını ZNPP-yə təhlükə yaratmaqda ittiham edir. Zaxarova qeyd edib ki, bu ittihamlar Rusiya tərəfinin BMT Təhlükəsizlik Şurasında Ukrayna hərbçilərinin stansiyaya hücum etməsi ilə bağlı istinad etdiyi faktlarla ziddiyyət təşkil edir.

“Biz Vaşinqtonu, Brüsseli və digər paytaxtları, ilk növbədə Avropa paytaxtlarını ZNPP ətrafında məsuliyyətsiz oyunlara və intriqalara son qoymağa və dərhal Kiyev hakimiyyətinə təsir edərək, onları zavodu və ona bitişik əraziləri atəşə tutmağı dayandırmağa məcbur etməyə çağırırıq”, - diplomat bildirib.

Rusiya XİN-in rəsmi nümayəndəsi onu da əlavə edib ki, Qərb ölkələrinin Kiyevin hərəkətlərinə bundan sonra da məhəl qoymaması onların vətəndaşları ilə yanaşı, Rusiya Federasiyası və Ukrayna sakinlərinin də “inanılmaz risk altında qalmasına” gətirib çıxaracaq.