Son 15 ildə İraqa öz fəaliyyətini genişləndirən İran mərkəzli mədəni, iqtisadi, sosial, dini və siyasi qurumları hədəfə alan İraq Milli Müxalifət Cəbhəsinin qurulduğu rəsmən elan edilib.

Publika.az xəbər verir ki, ABŞ-ın San-Dieqo şəhərində ilk toplantısını keçirən cəbhəyə rəhbər təyin olunan iraqlı professor İmad Xamis diqqətçəkən açıqlamalar verib.

Xamis əsas məqsədlərinin güclü və böyük İraqı yenidən qurmaq olduğunu vurğulayıb: “Çox yaxında meydana çıxacağıq. İranı İraqdan tamamilə silib müstəqil siyasi idarəetmə modeli quracağıq”.

Professor BMT, Avropa Birliyi və bir çox beynəlxalq təşkilatlarla, xüsusilə İslam dünyası ilə sıx əlaqədə olduqlarını deyib:

“Kaliforniya ştatının San-Dieqo şəhərində təsis konfransını keçirdik. Bundan sonrakı addım meydana çıxmaq olacaq. Bu istiqamətdə İraqda çox geniş iştirakla bir toplantı keçirəcəyik”.

Xamis hazırda İraqda siyasi hökumətin qurulmasının mümkün olmadığını və prezidentin seçilə bilməyəcəyini bildirib: “İraq Milli Müxalifət Cəbhəsinin beynəlxalq legitimlik problemi olmayacaq. Biz indi İraqın mühacirətdə olan hökumətiyik. Amma tezliklə bu struktur İraqı idarə edən siyasi gücə çevriləcək”.

Xamis çıxışına belə davam edib:

“İraqın işğalından sonra ortaya çıxan bölünmüş mənzərə İranı gücləndirdi. Birincisi, siyasi hakimiyyətə nəzarəti ələ keçirdilər. Sonralar hərbi və iqtisadi hakimiyyət tamamilə Tehranın əlinə keçdi. Ölkəmiz 15 ildir ki, müstəmləkə modeli ilə idarə olunur. Bu, həm ictimai birliyi zəiflətdi, həm də yoxsulluğu dərinləşdirdi. Bununla belə, İraqın çiçəklənən, qüdrətli bir ölkə olmaq üçün hər cür potensialı var.

Oktyabr İnqilabı İraq Milli Müxalifət Cəbhəsinin əsas dinamikasını təşkil edir. İranın başçılıq etdiyi işğalda 900 şəhid verdik, 30 minə yaxın yaralımız oldu. Tezliklə bu ruh daha da güclənəcək. Biz İraqda yeni sistem quracağıq. Bizim orduda, siyasətdə, qeyri-hökumət təşkilatlarında və ictimai səviyyədə böyük dəstəyimiz var.

İraq xalqı İran müstəmləkəsindən xilas olmaq istəyir, artıq bu iradəsini nümayiş etdirib. Bütün dünya tezliklə İraqdakı dəyişikliyi görəcək. İranın rəhbərlik etdiyi siyasi sistem tamamilə sıradan çıxarılacaq.

Saxtakarlığa əsaslanan, hətta 10 faiz seçicinin iştirak etmədiyi seçkilər keçirilir. Biz bu xaosa son qoyacağıq. İraqda idarəetməni ələ alacağıq, sonra texnokrat hökuməti quracağıq. Bundan sonra maksimum altı ay ərzində seçkilər keçirəcəyik və İraq xalqının seçiminə uyğun hökumətin iqtidara gəlməsini təmin edəcəyik”.