"ABŞ Rusiyanın təcavüzünə qəti şəkildə müqavimət göstərməyə, NATO və G7-nin birliyinə, Ukraynanı dəstəkləməyə hazır olduğuna əmindir".

Publika.az “Ukrinform”a istinadla xəbər verir ki, bu barədə Ağ Evin milli təhlükəsizlik üzrə müşaviri Ceyk Sallivan prezident təyyarəsinin göyərtəsində jurnalistlərlə söhbəti zamanı bildirib.

"İflas, parçalanma və ya birlik çatışmazlığı əlamətlərinin olması fikri, məncə, həqiqətən gördüklərimizlə təkzib olunur", - Baydenin müşaviri ABŞ-ın NATO birliyini qoruyub saxlamasının nə qədər çətin olduğu ilə bağlı suala cavab olaraq deyib.

Onun sözlərinə görə, mətbuat nədənsə Qərb ölkələrinin qətiyyətinin və sabitliyinin labüd tənəzzülünü fərz etməyə meyllidir, lakin bütün faktlar bunun əksini göstərir.

O xatırladıb ki, təkcə ABŞ deyil, həm də Avropa ölkələri hər gün müdafiə yardımı ilə bağlı yeni açıqlamalar verir, Avropa İttifaqı bu yaxınlarda enerji sektoru da daxil olmaqla, yeni uzaq perespektivli sanksiyalar paketi təqdim edib.

"Məncə, həm G7, həm də NATO güc və qətiyyətin çox təsir edici sübutları olacaq", - Sallivan deyib.

O, həmçinin xatırladıb ki, ABŞ Rusiyanın təcavüzünə cavab olaraq vahid və qəti mövqenin təmin edilməsi də daxil olmaqla 40 milyard dollar ayırıb.
"Bu, bir həftə deyil, bir ay deyil, üç ay deyil - bu, bizim uzun aylar ərzində yerinə yetirəcəyimiz öhdəlikdir və bu, ukraynalıları güclü dəstəkləməyə davam etməyə imkan verəcək", - Baydenin müşaviri bildirib.