Ukraynanın bəzi ərazilərini işğal etməsindən sonra Qərbdən gələn sanksiyalar fonunda təbii qaz satışı üçün şərtlər irəli sürən Rusiya tələbi qəbul etməyənlərə sərt üzünü göstərir.

Belə ki, Polşa, Bolqarıstan, Finlandiyanın ardınca Hollandiyaya da bu gün gecə yarısından etibarən qaz nəqli dayandırılacaq.

Cebhe.info xəbər verir ki, Rusiya rublunun dəyər itirməsinin qarşısını almaq üçün rəsmi Moskva təbii qazın dəyərinin məhz milli valyuta ilə ödənilməsini tələb edir. Polşa, Bolqarıstan, Finlandiya bu tələbi qəbul etməyib və "Qazprom" bu ölkələrə qaz nəqlini dayandırıb.

Hollandiyanın müvafiq qurumu olan "GastTerra" rublla ödəniş tələbini rədd etdiyinə görə bu ölkəyə qarşı da eyni mövqe sərgilənib.

31 maydan etibarən Hollandiyaya qaz nəqli dayandırılacağı açıqlanıb. "GasTerra"dan verilən açıqlamada bildirilib ki, rublla ödəmə Qərbin sanksiyalarından yayınmaqla bərabər, maliyyə və əməliyyat riskləri də daşıyır:

"Moskvada Rusiya qanunlarına görə hesab açmaq və bu hesabın Rusiya rejiminin nəzarətində olması şirkətimiz üçün daha böyük bir riskdir. Bu qaydada ödənişi rədd etməyimizə cavab olaraq "Qazprom" 31 maydan etibarən təbiiq az tədarükünü dayandıracağını bildirib".