"Ermənilərin Qarabağda qondarma "Artsax" adı altında yaratdıqları "respublikada" Rusiya ilə birləşmək meyilləri çox təəssüflər olsun ki, həm Ermənistan tərəfindən idarə olunur, həm də Rusiya hakimiyyətində müəyyən müəyyən dairələr tərəfindən dəstəklənir. Ona görə ki, qondarma "Artsax"ın arxasında Rusiya ilə birləşmək, Rusiya ilə nteqrasiya etmək hərəkatında Rusiyanın özünün də marağı var və qondarma rejim qalıqlarının bu meyillərində təəssüf ki, Ermənistan dövlətinin və Ermənistan hakimiyyətinin də maraqları var".

Bunu Milli.Az-a açıqlamasında "Bakı Xəbər" qəzetinin baş redaktoru, siyasi ekspert Aydın Quliyev deyib.

O bildirib ki, Brüssel görüşü ərəfəsində separatçıların belə bir məsələni ortaya atması Paşinyana təzyiq məqsədilə edildi:

"Brüssel görüşü ərəfəsində qondarma "respublika"da həmən çağırışların yenidən səslənməsi, hətta Rusi ya ilə birləşmək üçün güya kütləvi imza toplanması barədə məlumatların peyda olması təsadüfü deyil. Çünkü qondarma "respublika"da olan separatçıların ideoloqları çox yaxşı bilirlər ki, bu sayıq hərəkətlər həm Ermənistan hakimiyyətinə təzyiq göstərmək üçün bir üsuldur, həm də Rusiyada Kreml hakimiyyətində müəyyən dairələrin maraqlarına uyğunlaşmaq baxımından əhəmiyyətli gedişdir.

Sözsüz ki, Brüssel görüşü ərəfəsində Xankəndində bu qüvvələrin Rusiya ilə birləşmək, inteqrasiya etmək mövqeyinin tərəfdarlarının aktivləşməsi Paşinyana müəyyən təzyiq jestidir. Onlar Paşinyanı Azərbaycanla hər hansı bir formada razılığa gəlməkdən çəkindirməyə çalışırlar. Başa düşürlər ki, əks halda əgər Paşinyan mümkün qədər tez bir müddətdə əgər Azərbaycanla sülh sazişi imzalasa, bu saziş Ermənistanın xeyirinə olmaya bilər. Çünki Ermənistan müharibədə məğlub olmuş dövlət olduğuna görə, təbii ki, imzalanacaq sülh sazişində Ermənistanın daha uğurlu nəticələr əldə edə bilmək ehtimalı çox zəifdir. Azərbaycan qalib və həm də haqlı dövlət olduğuna görə sülh sazişinin məzmunu Azərbaycanın prinsiplərinə daha çox uyğun olacaq, nəyinki Ermənistanın. Ona görə də separatçı qüvvələr Paşinyana təzyiq göstərib, onu ən yaxın vaxtlarda Azərbaycanla sülh sazişinə gəlmək mövqeyindən çəkindirməyə çalışırlar ki, bu mövqeyi Brüssel görüşü ərəfəsində də fəal şəkildə nümayiş etdirdilər.

Qondarma rejim qalıqlarının hazırda mövcud olduğu Qarabağ ərazilərində Rusiya ilə birləşməyə meyilli tərəfdarların Moskvadan müəyyən qədər həvəsləndirildikləri, idarə edildikləri şübhəsizdir. Çünki Rusiya ilə birləşmək barədə çağırışlara qədər keçmiş Dağlıq Qarabağın ərazisində və Xankəndində bu yöndə müəyyən addımlar atılıb. Xüsusilə orada rus dilli icmanın yaradılması, rus dilinin güya ikinci dil elan olunması, rus icmasının formalaşdırılması, hətta orada müəyyən insanlara Rusiyanın vətəndaşlıq vəsiqəsinin paylanması barədə məlumatlara təsadüf kimi baxmaq olmaz. Onlar Xankəndində, keçmiş Dağlı Qarabağ ərazisində Rusiyaya yönəlmiş müəyyən hərəkatların, proseslərin başlanması üçün baza yaratmaq cəhdi kimi dəyərləndirilməlidir.

Aydın məsələdir ki, Qarabağ ərazisində Rusiya ilə birləşmək üçün çağırışların səslənməsinə təsadüf kimi baxılmamalıdır. Bunlar nə vaxtsa Krem hakimiyyətində müəyyən qüvvələr tərəfindən açıq şəkildə dəstəklənə bilər. Ruisya ilə birləşmək çağırışları əgər bu gün daha çox Paşinyan hakimiyyətinə təzyiq xarakteri daşıyırsa, sabah Azərbaycanın özü üçün təzyiq xarakterli bir gedişə çevrilə bilər. Ona görə də biz ən pis ehtimalları kənara qoymamalıyıq və bunların hər birinin, bu cür ehtimalların nə vaxtsa reallaşa biləcək perespektiv kimi qəbul etməli və lazımı tədbirlər görməliyik.

Xüsusilə də unutmaq olmaz ki, Moskva ilə birləşmək üçün qondarma rejim qalıqları tərəfindən edilən çağırışlar gələcəkdə Azərbaycanın özünə də bir təzyiq üsulu kimi daha da gücləndirilə bilər. Necə ki, biz həmin meyli bu gün Dnestryanı respublikada (Moldova), Cənubi Osetiyada, Abxaziyada (Gürcüstan) görürük, eynilə nə vaxtsa Ruisya hakimiyyətindəki müəyyən dairələr Xankəndindəki həmin prosesləri Azərbaycana qarşı bir təzyiq üsulu kimi ortaya ata bilərlər.

Bütün hallarda Azərbaycan dövləti güclü olamlıdır və gələcəkdə bu tip hadisələrin baş verə bilmək ehtimalının qarşısını tam şəkildə almaq Azərbaycanın əlində olmasa da, amma onların bu niyyətlərinin iflasa uğradılması yalnız Azərbaycan dövlətinin gücünə bağlıdır. Nə qədər ki, Azərbaycan dövləti güclü olacaq, həmin o separatçılıq meyilləri heç vaxt uğur qazana bilməz. Ona görə Qarabağdakı həm Ermənistanla birləşməyə istiqamətlənmiş separatçılıq meyilləri, həm də Rusiya ilə birləşməyə hesablanmış separatçılıq meyillərinin hər ikisi təhlükəlidir və bunlarının qarşısının alınmasında ən böyük etibarı, qarant qüvvə Azərbaycan dövlətinin gücüdür".

Qeyd edək ki, Qarabağ separatçıları Brüssel görüşü öncəsi Paşinyanı hədələyiblər ki, "Əliyevin şərtlərini qəbul etsən, biz Rusiyanı seçəcəyik". "Hraparak" qəzeti yazır ki, Brüsseldə sənəd imzalanacağı təqdirdə, ilk saniyədən etibarən Qarabağda "respublika"nın Rusiyaya birləşməsi istiqamətində siyasi prosesə başlamaq qərara alınıb.