Rusiya öz təşəbbüsü ilə Avropa Şurasından çıxıb.

Publika.az xəbər verir ki, bu barədə Ukrayna Ali Radasının Konstitusiya Məhkəməsindəki nümayəndəsi Olqa Sovgirya məlumat verib.

Sovgiryanın sözlərinə görə, bu, avtomatik olaraq Rusiyanın Avropa Şurasının bütün orqanlarında, o cümlədən Venesiya Komissiyasında üzvlüyünün dayandırılması deməkdir.

Vəziyyəti Rusiya Federasiyası Prezidentinin mətbuat katibi Dmitri Peskov şərh edib. O, rusiyalı jurnalistlərə bildirib ki, Rusiyanın Avropa Şurasından çıxması onun bütün institutlarından çıxması deməkdir.

Rusiyalı hüquqşünas Pavel Çikovun qeyd etdiyi kimi, Avropa Şurasının Nizamnaməsinə əsasən, ölkə gələn il yanvarın 1-dən üzvlüyünü dayandırır. Yəni, Rusiya Federasiyası yalnız 2023-cü il yanvarın 1-də Avropa Şurasından rəsmən çıxacaq.

Xatırladaq ki, 2014-cü ilin aprelində Avropa Şurası Parlament Assambleyası Krımın ilhaqı ilə əlaqədar Rusiya nümayəndə heyətini səsvermə hüququndan məhrum edib və onun nümayəndələrini assambleyanın bütün rəhbər orqanlarından xaric edib. Bununla bağlı Rusiya 2017-ci ilin iyun ayından Avropa Şurasına ianə ödəmir. AŞPA-nın bir çox üzvləri və siyasətçiləri Rusiyanın bu cür hərəkətlərini şantaj adlandırıblar.