Rusiya prezidenti Vladimir Putin SSRİ vaxtında Azərbaycan və Ermənistan arasında dövlət sərhədinin şərti olduğunu bildirdi və indi onun müəyyənləşdirilməsi istiqamətində işlərin aparılmasına yardım edəcəklərini vurğuladı.

GUNinfo.az bildirir ki, Putinin bu açıqlamasını KONKRET.az-a şərh edən politoloq Məhəmməd Əsədullazadə bildirib ki, Putin delimitasiya və demarkasiya prosesində iki ölkə arasında problemin davam etməsində maraqlı görünür: “Azərbaycan və Ermənistan arasında SSRİ vaxtında tikanlı məftil olmasa da, şərti sərhədlərin haradan keçdiyi, eləcə də iki ölkənin hüdudları müəyyən edilmişdi. Putinin bu fikirləri isə Ermənistanın iddialarına xidmət edir. Əgər belədirsə, o zaman Azərbaycan 1918-ci il sərhədlərinin bərpasını tələb etməlidir. Zəngəzur və digər böyük ərazilər Azərbaycana məxsus olduğu üçün qaytarılmalıdır”.

Politoloq əlavə edib ki, əgər Rusiya sərhədlərin delimitasiyasında vasitəçi olacaqsa, bu zaman problem davam edəcək: “Ona görə də Azərbaycan rəsmi şəkildə Ermənistana ikitərəfli danışıqlar aparmağı təklif edib. Heç bir ölkənin vasitəçiliyi olmadan danışıqlar aparılarsa, o zaman proses uğurla yekunlaşacaq. Amma Ermənistanın bu təklifi qəbul edəcəyi gözlənilmir.