Rusiya, Ermənistan və Azərbaycanın imzaladığı üçtərəfli Bəyanat ardıcıl surətdə həyata keçirilir.

KONKRET.az xəbər verir ki, bu sözləri Rusiya Prezidenti Vladimir Putin KTMT sammitindəki çıxışı zamanı deyib.

“İndi hamı birlikdə ümumi səylərlə döyüş əməliyyatları zonasında zərər çəkmiş insanlara kömək etmək, qaçqınların qayıtması ilə bağlı yaranan humanitar problemləri həll etmək, dağılmış infrastrukturu bərpa etmək, tarix, mədəniyyət və dini abidələrin mühafizəsini həyata keçirmək lazımdır”, – deyə Putin bildirib.

Rusiya prezidenti əlavə edib ki, Qarabağda situasiyanın yoluna qoyulması üzrə humanitar səylərə KTMT və MDB üzrə tərəfdaşların qoşulmasını da alqışlayardı. Habelə o, hazırda bu məsələ barədə digər beynəlxalq təşkilatlarla da müzakirələrin davam etdiyini bildirib.

Putinin sözlərinə görə, Ermənistan və onun xalqı öz tarixində mürəkkəb dövr yaşadı. Ölkə rəhbərliyi, xüsusən baş nazir Nikol Paşinyan isə ağır, amma zəruri qərar verməli oldu.