Dəniz quldurları – piratlar Qvineya körfəzində “Curacao Trader” tankerinə hücum ediblər.

"Report" xəbər verir ki, bu barədə dəniz təhlükəsizliyi üzrə ixtisaslaşmış "Dryad Global" şirkətinin portalı bildirib.

Qeyd edilir ki, girov götürülmüş ekipajın 15 üzvü arasında Rusiya və Ukrayna vətəndaşları da ola bilər.

Məlumata görə, hücum Nigeriyanın Bayels ştatından 210 dəniz mili məsafədə olub. Gəmi suya Toqo paytaxtından buraxılıb.

"İlkin xəbərlərə əsasən, gəmiyə səkkiz silahlı insan yaxınlaşıb və göyərtəyə qalxıb, nəticədə ekipajın 15 üzvü oğurlanıb. Ekipajın oğurlanmış üzvlərinin Rusiya Federasiyası və Ukrayna vətəndaşları olduğu təxmin edilir", - portal bildirib.

Qeyd edək ki, Qvineya körfəzi piratların fəaliyyəti baxımından dünyanın ən təhlükəli yerlərindən biridir.