Son günlər ölkədə koronavirusa yoluxma hallarında qeydə alınan artım cəmiyyətdə bir qədər narahatlıq yaradır.

Lakin, aparılan araşdırmalar və statistik rəqəmlər onu göstərir ki, Azərbaycanda pandemiya ilə mübarizə çərçivəsində aparılan tədbirlər digər ölkələrlə müqayisədə daha efekli olub.

Belə ki, zamanında koronavirusla mübarizə çərçivəsində tətbiq edilən qabaqlayıcı tədbirlər və vaksinasiya məsələsi əhalinin sağlamlığının qorunmasına zəmin yaratdı.

Həkimlər bu gün koronavirusun yeni, mutasiyaya uğramış “Delta” və digər növlərindən qorunmaq üçün vaksinasiyanın önəmli olduğunu bildirirlər.

İnfeksionist Nicat Əzimli Oxu.Az-a açıqlamasında bildirib ki, digər ölkələrlə müqayisədə ölkəmizdə daha qənaətbəxş epidemik vəziyyət olsa da hazırda yoluxma sayı 2000-i ötür:

“Təəssüf ki, bir müddətdir azalma dinamikasına keçə bilmirik. Bu da sizin qeyd etdiyiniz kimi, mübarizəni artırmağı, xüsusilə buster dozaya əhəmiyyət verilməsini zəruri edir. Nəzərə alsaq ki, Azərbaycanda ən geniş istifadə olunan vaksin “Coronavac”dır. Bu vaksinin efektinin digərlərinə nisbətən daha qısamüddətli olduğu artıq elmə məlumdur.

Bununla birlikdə, iki doza vaksin almış böyük bir əhali qrupu artıq altı ayı geridə qoyub və orqanizmlərindəki spesifik immunitet zəifləyib və ya itib. Bu səbəbdən də vaksinli xəstələnmələrə çox rast gəlməyə başlamışıq. Burdan belə nəticəyə gəlmək olar ki, vaksinasiyanın növbəti mərhələsində mRNT vaksinlərinə üstünlük verilməsinə, xüsusilə, vaxtı çatmış buster dozaların tətbiqinə üstünlük verilməlidir”.