Koronavirusun Azərbaycanda yayılmağa başladığı vaxtlarda bu virusun mövcudluğuna inanmayanlarla yanaşı, xəstəliyi qışda keçirdiyini düşünənlər də var idi. Əhalinin bir qismi hələ də koronavirusu qış aylarında keçirdiyini düşünür. Onlar bunu həmin vaxtlarda qeydə alınan yüksək qızdırma və halsızlıqla əlaqələndirirlər. Bu vaxta qədər koronavirusa yoluxmamış şəxslər arasında da bu düşüncədə olanlar var.

Ümumdünya Səhiyyə Təşkilatı isə koronavirusun ötən ilin dekabr ayından yayıldığını bildirərək fevral ayında pandemiya elan edib. Lakin xəstəliyə ilk yoluxma halının noyabrda baş verməsi ilə bağlı məlumatlar da var. Bu səbəbdən də onlarla, bəlkə də yüzlərlə insan qış aylarında ölkəmizdə yayılan ağır xəstəliyin koronavirus olduğunu düşünürlər. Ətrafında xeyli koronavirusa yoluxmuş şəxsin olmasına baxmayaraq özündə hər hansı narahatlıq hiss etməyənlərin, təbii olaraq, "koronavirusu keçirmişəm, immunitetim yaranıb" qənaətinə gəlməyinə səbəb olur. Lakin belə düşünənlərin özlərində də bəzən buna qarşı şübhə yaranır.

Koronavirusun ölümcül virus olmadığı hər kəsə məlumdur. Artıq dəfələrlə qeyd olunub ki, bu virusdan ölənlər, əsasən, başqa ağır xəstəlikləri olan şəxslərdir. Bədənə daxil olan virus immun sistemini zəiflətdiyi üçün orqanizmin digər xəstəliklərə müqaviməti azalır və xəstə ölür. Bununla yanaşı koronavirusu heç nə olmamış kimi keçirənlər də az deyil. Hətta bəlkə də çoxumuzun ətrafında ailə üzvləri koronavirusa yoluxub, lakin özünün testi neqativ çıxan insanlar var.

Məhz bu səbəbdən də, yəni koronavirusu simptomsuz keçirənlərin, bədənində koronavirusa qarşı immuniteti yaranan insanların faizini müəyyənləşdirmək üçün dünyanın bir sıra ölkələrində seroloji testlər keçirilir. Artıq bir çox ölkələrdə pandemiya səbəbi ilə alınan qabaqlayıcı tədbirlərin aradan götürülməsi və ikinci dalğanın yayılmasına mane olmaq məqsədi ilə bu xəstəliyə qarşı immuniteti yaranan şəxslərin müəyyənləşdirilməsi prosesi başlayıb.

Əvvəllər Covid-19-la bağlı PSR testləri icra olunurdu ki, bu analizlər birdəfəlik nəticə verirdi, hazırda bədəndə bu virusun olub-olmadığını müəyyənləşdirirdi. Seroloji testlər isə tam fərqlidir. Belə ki, bu testlər orqanizmin bu virusla qarşılaşıb-qarşılaşmaması və bədəndə virusa qarşı immunitetin formalaşması barədə məlumat verir.

Artıq ölkəmizdə də əhali arasında təsadüfi seçilmiş insanlardan, təxminən 1650-yə yaxın şəxsdən seroloji testlərin götürülməsi prosesi başlanılıb. İlkin mərhələ olaraq, Bakı, Sumqayıt və Gəncə şəhərlərində təsadüfi proqramla seçilmiş şəxslərdən testlər götürüləcək.

Azərbaycanda bu testlərin keçirilməsini müraciət olunan şəxslərin əlinə düşən gözəl fürsət kimi dəyərləndirmək olar. Çünki TƏBİB-in infeksionistləri açıqlamalarında bildirib ki, onlara "öyrənmək istəyirəm ki, mən koronavirusa yoluxub keçirmişəm, yoxsa yox?" sualı ilə müraciət edənlərin sayı çoxdur. Belə ki, tamamilə pulsuz və təhlükəsiz həyata keçirilən seroloji testlər koronavirusu keçirib-keçirmədiyini düşünənlər üçün dəqiq cavab öyrənməyə, şübhələrdən qurtulmağa kömək olacaq.

Testlərin götürülməsi prosesi isə heç də qorxulu deyil. Proses adi qan analizindən qətiyyən fərqlənmir. Üstəlik, bu testi verən şəxs istəsə, ona qanın ümumi analiz cavabları da əlavə olaraq təqdim olunur.