"Təəssüf ki, BMT Təhlükəsizlik Şurası bir daimi üzvə - ABŞ-a görə atəşkəs qətnaməsini rədd etdi. Biz deyirik ki, ədalətli sülh mümkündür, lakin ABŞ-la bu mümkün deyil. BMT-də mütləq şəkildə islahatlar aparılmalıdır".

Publika.az "Anadolu" agentliyinə istinadla xəbər verir ki, bunu Türkiyə Prezidenti Rəcəb Tayyib Ərdoğan deyib.

Türkiyə lideri həmçinin Amerika Birləşmiş Ştatları BMT Təhlükəsizlik Şurasının Fələstin sektorunda təcili humanitar atəşkəs tələb edən Qəzza ilə bağlı qətnaməsinə veto qoyma qərarına görə tənqid edib.

"Biz Qəzzalı anaların müdafiəsi üçün çıxış etməyə davam edəcəyik", - Ərdoğan vurğulayıb.

Qeyd edək ki, ABŞ Birləşmiş Ərəb Əmirliklərinin (BƏƏ) Qəzza zolağı ilə bağlı BMT Təhlükəsizlik Şurasında qəbul etdiyi qətnamə layihəsini bloklayıb. Təhlükəsizlik Şurasının 13 üzvü sənədin qəbulunun lehinə səs verib, başqa ölkə - Böyük Britaniya bitərəf qalıb, lakin tək qalan ABŞ layihəyə veto qoyub.

Qətnamə BMT-yə üzv 97 ölkə tərəfindən dəstəklənib. Bu, dərhal humanitar atəşkəs və bütün girovların azad edilməsini nəzərdə tutur. Beynəlxalq təşkilatın Təhlükəsizlik Şurası da münaqişənin bütün tərəflərindən beynəlxalq hüquq çərçivəsində öhdəliklərini yerinə yetirmələri tələbini təkrarlayıb.

Sənəddə "Qəzza zolağındakı fəlakətli humanitar vəziyyətdən və fələstinli mülki əhalinin əzabından" dərin narahatlıq ifadə edilir.

Hüseyn İbadlı