İnsanlar istədikləri qəhvəni içə bilərlər, ancaq orqanizmə zərər verməmək üçün içkinin hazırlanma qaydasını bilmək vacibdir.

Publika.az xəbər verir ki, qəhvə blogeri, Rusiya Qəhvə Həvəskarları Məktəbinin rəhbəri Olqa İqnatieva bu barədə “Sputnik Radio”ya verdiyi müsahibədə dadlı qəhvənin reseptlərini bölüşüb:

“Keçmiş həkim kimi mənim üçün fayda həm zövq, həm də əlavə bonuslar gətirən bir şeydir. Müasir araşdırmalara görə, kağız filtrindən keçən qəhvə daha faydalıdır. Belə bir filtr ateroskleroz və sair kimi xəstəliklərin inkişafına zəmin yarada biləcək müxtəlif maddələrin qarşısını alır”.

İqnatievanın sözlərinə görə, qara qəhvəni sevənlər onu kağız filtrindən damcı üsulu ilə hazırlamalıdırlar. Bu, xolesterin səviyyəsini artırmağa kömək edən maddələrin orqanizmə daxil olmasına mane olur.

Ancaq blogerin sözlərinə görə, bu tövsiyə bütün növ qəhvələr üçün uyğun deyil. Məsələn, espressonu kağız filtrindən süzmək olmur. İnsan sadəcə bədəndəki yağ səviyyəsini, xolesterini və s. izləməlidir. Olqa İqnatieva xüsusən də bir sıra xəstəliklərə meylli olanlar üçün türk qəhvəsini az faydalı hesab edir.