Dibçək gülləri əvvəllər bütün xanımların pəncərələri qabağında, eyvanlarda, pilləkənlərin kənarlarında olardı və olduğu yerləri bəzəyərək göz oxşayardı desək yanılmarıq. Dibçək güllərinə baxmaq belə insanda xoş əhval-ruhiyyə, müsbət emosiyalar yaradır, evin havasını təravətli edir. Doğrudur bu gün də evdə çiçək bəsləyənlər var, amma sintetik, süni güllərə daha çox üstünlük verilir. Nənələrimizin saxladığı iki növ çiçək, dibçək gülü haqqında xatırlatmaq istərdik.
1-Ətirşah - qan axınını stimullaşdırır, ürək ritmini və ürək əzələsinin işini normallaşdırır, antiseptik, ağrıkəsici, sidik qovucu, bakteriosid, antivirus, qankəsici və şəkər əleyhinə təsirlərə malikdir, baş ağrısında kömək edir.
Ətirşah - həmçinin zökəm, öskürək, angina, stomatit və soyuqdəymə üçün əla vasitə sayılır. Bu hallarda yarpaqlar qaynadılaraq onlardan məhlul düzəldilir və boğaz o məhlulla yaxalanır. Otit zamanı da geniş istfadə olunan ətirşah, bükülərək qulağa yerləşdirilir ki, ondan ayrılan efir yağları buxarı müalicəvi təsir edir. Diş ağrıdığı zaman dişin üzərinə qoyula bilər. Belə ki, ətirşahın ifraz etdiyi aktiv maddələr ağrı hissinin götürülməsini təmin edir. Bundan əlavə doğranmış yarpaqlardan edilən kompreslər osteoxondroz və radikulit xəstəliyinin müalicəsində çox effektlidir. İnsanlar hazırladıqları mürəbbələrə, şorabalara - tutmalara Ətirşah yarpağı atmaqla bu gözəl çiçəkdən kulinariyada da geniş istifadə edirlər.
2-Aloye insan orqanizmi üçün çox faydalı xüsusiyyətlərə malikdir. İltihab əleyhinə, yarasağaldıcı, antibakterial, ödqovucu, yanıq əleyhinə təsirləri vardır. Aloye şirəsi zədələnmiş toxumaların regenerasiyasını sürətləndirir, sıyrıntılar və faringit xəstəliyində çox effektlidir.
Azərbaycanlı qadınların tövsiyyələrindən biri də saç kəsdirərkən və saçı darayarkən çıxan saçları atmamaqla bağlı idi. Belə ki, əsasən körpə uşaqlar və qızlar, gəlinlər başda olmaqla əgər kim saçını zibilə atarsa inanclara görə həmin adamın daim başı ağrıyarmış. Ona görə də çıxan saçları mütləq gülün, çiçəyin dibinə basdırmaq lazım gəldiyini məsləhət görərdilər. Bu gün elmə məlumdur ki, insan saçı güllər, çiçəklər üçün əsil qida maddəsi imiş.
***
Vashington Profile yazır: Amerika Missisipi Universitetinin bioloqları insan saçlarının yeni istifadə sahəsini tapmışlar və onlardan gübrə kimi istifadə etmək mümkündür.

Müəllif: Firəngiz Rüstəmova
"FOLK VƏ YA XALQ TƏBABƏTİ" kitabından