Yuxusuzluq və yuxudan doymamaq artıq insanların sağlamlığını təhlükə altında qoyub.
Nə qədər edirəm, yuxuya gedə bilmirəm deyənlər üçün amerikalı pilotların xüsusi " sönmə" texnikasını təklif edirik.

Sfera.az medicina.az-a istinadən cəmi 2 dəqiqəyə yuxu gətirəcək 50 illik metodu araşdırıb.

Hələ İkinci Dünya Müharibəsində amerikalı pilotlar görürdülər ki, az da olsa mürgüləyib yatmayanda qırıcı pilotlar ciddi səhvlərə yol verir və tapşırıqları yerinə yetirə bilmir.

Ona görə hərbçi pilotlar yuxunun onlar üçün ölüm-qalımməsələsi olduğunu anlayıb, yuxuya getmək texnikası işləyib hazırlayırlar. Bu elmi metodun test olunması leytenant Bad Vinterə həvalə olunur.

Əvvəllər o futbol treneri idi və idmançıların relaksasiyası işlərini bilirdi.

Bad Vinterin hazırladığı metod özünü doğrultdu və effektiv oldu. Cəmi 6 həftəlik məşqlərdən sonra pilotların 80%-i cəmi 2 dəqiqəyə yuxuya gedirdilər. Onlar hətta atəş səsləri altında belə oturduqları yerdə şirin-şirin yatıb yuxularını alırdılar.

Metod necədir:

1.Rahat poza alın

İstər çarpayıda uzanın, istər kresloda, hətta olduğunuz istənilən yerdə söykənəcəyi olan stul seçin.

2.Üz əzələlərini boşaldın

Bu işin püf nöqtəsidir. İnsan üzü onu gərginliyini göstərən birinci orqandır. Gözlərinizi bağlayıb, əvvəlcə alnı boşaldın, əzələləri rahatladın, sonra yanaqlar, çənə, boyun və dilinizi boş tutun.

Bunu etdikdə görəcəksiz ki, tənəffüs dərin və aramla olur. Daha sonda yumduğunuz gözləri boşaldın, gözdə 6 əzələ var, onlar yumulanda gərginləşir. Amma insan yuxuda olanda gözlər elə gərginliklə yumulmur.

3.Çiyinlərini aşağı endirin

Elə edin ki, sanki çiyinləriniz boş torba kimi ayaqlarınıza doğru axır. Bütün gərginliyi sinədən dərin nəfəs alıb verməklə buraxın, boyun, çənə, çiyinlər boş olmalıdır.

4.Əllərinizi boşaldın

Əllər ağırlaşır və sanki boş şəkildə düşüb qalır. Əgər alınmırsa, güclü yumruq sıxıb buraxın və təkrar edin. Biləklər, barmaqlar hamısı boş olmalıdır

5.Ayaqları boşaldın

Elə hiss edin ki, sanki ayaqlarınızdan nəsə ağırlıq asılıb və onlar ağırlaşır. Əvvəl fikrinizi sol tərəfə yönəldin, dabanlara kimi rahatlayın, sonra sağ tərəfə keçin.

6.Beyni 10 saniyə təmiz tutun

Bədən əzələləri tam boş olduqdan sonra beynə sönmə əmri vermək lazımdır.

Bu sanki telefonunuzun sönməsinə bənzəyir. Telefonun tam sönməsi üçün bir neçə saniyə tələb olunur. Beyin də elədir. Bütün kənar fikirləri, sözləri, hərəkətləri azdırın. Bunun üçün özünüzü sakit mavi gölün üzərində uzanmış vəziyyətdə təsvir edin. Gözləriniz yalnız mavi təmiz səma görür. Və yaxud belə təsəvvür edin ki, qapqara məxməri bir otaqda uzanmısız, gözləriniz yalnız qaranlıq görür, zülmətdən başqa heç nə. Bu vəziyyəti cəmi 10 saniyə yarada bilsəz, texnika bitir.

Beyni gərgin olanlar özlüklərində " heç nə düşünmə, düşünmə, düşünmə" sözlərini 10 saniyə təkrarlasın.

Bunları etdikdən sonra nə vaxt yuxuya gedəcəyinizi bilməyəcəksiz.

Metodun müəllifi deyir ki, ən azı 1-2 həftə hər gün lazım olanda bunu məşq etsəniz bu texnika sizdə mütləq alınacaq və siz asanlıqla yuxuya gedəcəksiz. Ona görə ilk dəfədən alınmayanda buraxmayın.