Xüsusilə payız və qış aylarında soyuq hava və günəş şüalarının azlığı immun sisteminin zəifləməsinə səbəb olur. Bu dövrdə mövsümi qrip, sinusit, bronxit, angina kimi respirator xəstəliklərə daha çox rast gəlinir.

Medicina.az xəbər verir ki, Xəzər Tibb Mərkəzinin həkim-infeksionisti İlahə Əsədovanın sözlərinə görə, bu dövrdə infeksion xəstəliklərin artması gözləniləndir:

“Hava-damcı yolu ilə yayılan infeksiyalar, hətta parotit və suçiçəyi kimi xəstəliklər də bu dövrdə artır. Çünki qışda insanların iş yerləri, məktəblər, ictimai nəqliyyat kimi sıx kollektivlərdə olması infeksion xəstəliklərə yoluxma riskini artırır. Ümumiyyətlə, bu dövrdə böyüklərdə ən çox rast gəlinən infeksion xəstəliklər sırasında hepatitlər, virus və bakterial mənşəli qrip, hava-damcı yolu ilə yayılan müxtəlif infeksiyalar, eyni zamanda yumşaq toxumaların iltihabi xəstəlikləri üstünlük təşkil edir”.

Astara Rayon Mərkəzi Xəstəxanasının həkim-infeksionisti Tərzan Dadaşov isə bildirir ki, xroniki xəstəliyi olan şəxslərdə infeksiyalar daha ağır keçə bilir:

“Respirator infeksiyalar, adətən, yüksək hərarət, öskürək, boğaz ağrısı, halsızlıq və burun axıntısı kimi əlamətlərlə özünü göstərir. Xroniki xəstəlikləri olanlarda infeksion xəstəliklərin gedişi daha ağır olur və sağalma müddəti uzanır. Buna görə də, infeksiyaların erkən aşkarlanması, profilaktik tədbirlərin görülməsi və tibbi nəzarətin təmin olunması mühüm əhəmiyyət daşıyır”.
İ.Əsədova vurğulayır ki, fəsil dəyişiklikləri, düzgün qidalanmamaq, stress, kifayət qədər istirahət etməmək və artıq fiziki yüklənmə immuniteti zəiflədir:

“Xüsusilə qoruyucu vasitələrdən istifadə etməyən şəxslərdə, allergik xəstəlikləri olanlarda və ya xroniki xəstəlikləri olanlarda infeksiyalar daha tez yaranır. Yoluxma mənbəyi, adətən, xəstə şəxslər və ya infeksiyalı əşyalar olur".

T.Dadaşovun fikrincə, infeksion xəstəliklərin müalicəsi xəstəliyin törədicisindən, kliniki gedişindən və xəstənin ümumi vəziyyətindən asılı olaraq aparılmalıdır:

“Müalicə planı hər bir xəstə üçün fərdi şəkildə müəyyən edilir və özbaşına dərman qəbulu qəti şəkildə tövsiyə olunmur. Virus mənşəli infeksiyalarda, əsasən, simptomatik müalicə tətbiq edilir.

Bu zaman bədən hərarətinin aşağı salınması, ağrıların azaldılması və ümumi vəziyyətin yaxşılaşdırılmasına yönəlmiş tədbirlər görülür. Orqanizmin istirahəti və immun sisteminin dəstəklənməsi müalicədə mühüm rol oynayır.
Bakterial infeksiyalarda isə müalicə həkim təyinatı əsasında aparılır və uyğun preparatlar istifadə edilir. Müalicə kursunun tam şəkildə başa çatdırılması ağırlaşmaların qarşısının alınması baxımından vacibdir”.

Həkim-infeksionistlər vurğulayır ki, bol maye qəbulu, kifayət qədər istirahət və düzgün qulluq müalicənin ayrılmaz hissəsidir. İlkin simptomlar müşahidə olunduğu dövrdən aidiyyəti üzrə sahə həkimləri və həkim-mütəxəssislərə müraciət etmək xəstəliyin daha qısa zamanda aradan qaldırılmasında önəmli rol oynayır.