Alimləri xroniki ağrını azaltmağın yolunu tapıblar.

Milli.Az xəbər verir ki, Pennsylvania Universitetinin alimləri sinir hüceyrələrinin müəyyən qrupunu bloklamağın xroniki ağrıları, o cümlədən baş ağrılarını yüngülləşdirə biləcəyini aşkar ediblər.

Nəticələr "Nature" portalında yayımlanıb.

Təcrübələrdə laboratoriya siçanlarında sinir hüceyrələrinin xüsusi qrupunun ilkin ağrı stimulundan sonra aktivləşdiyi müəyyən edilib. Bu hüceyrələr təsir bitdikdən sonra da fəaliyyətini davam etdirir. Hüceyrələr beynin nüvəsi boyunca yerləşib və bu bölgə ağrı siqnallarının ötürülməsi, həmçinin tənəffüs, yuxu və qorxu reaksiyası kimi əsas fizioloji proseslərdə iştirak edir.

Alimlər müəyyən ediblər ki, bu neyronlar Y1R reseptorları daşıyır. Reseptorları aktivləşdirilən siçanlarda ağrıya xas davranışlar müşahidə olunub. Neyronları blokladıqda isə xroniki ağrının göstəriciləri zəifləyib, lakin təhlükəli stimullara (məsələn, isti səthə toxunmaq) olan kəskin ağrı reaksiyası qorunub.

Professor Jeremy Betli qeyd edib ki, Y1R neyronları özləri ağrı yaratmır, amma xroniki ağrının formalaşmasında iştirak edən geniş neyron şəbəkəsinin bir hissəsidir.

Başqa bir eksperimentdə xroniki ağrı hiss edən siçanlar aclıq, susuzluq və ya yırtıcı heyvanın qoxusu kimi müxtəlif stress faktorlarına məruz qoyulub . Bu zaman onların ağrı reaksiyaları zəifləyib, yəni uzun müddətli aclıq zamanı siçanlarda təbii ağrı bastırma mexanizmi aktiv olur.

Alimlər bildirir ki, bu kəşf xroniki ağrının molekulyar mexanizmlərinin öyrənilməsi üçün faydalı ola bilər. Gələcəkdə Y1R neyronlarının bloklanması insanlarda da xroniki ağrının müalicəsində effektiv üsul ola bilər, lakin bunu təsdiqləmək üçün əlavə tədqiqatlar aparılmalıdır.