Bir çox insan pəhriz saxlamasına və idman etməsinə baxmayaraq arıqlamaqda çətinlik çəkir. Bunun əsas səbəblərindən biri gündəlik həyatda formalaşmış və fərqinə varılmayan zərərli vərdişlərdir.

Milli.Az xəbər verir ki, ən çox rast gəlinən amillərdən biri səhər yeməyini buraxmaqdır. Orqanizm günün əvvəlində aldığı qida ilə maddələr mübadiləsini aktivləşdirir. Səhər yeməyinin olmaması isə bədənin enerji ehtiyatını qoruma rejiminə keçməsinə və yağ yandırma prosesinin zəifləməsinə səbəb olur.

Şəkər və ağ un məhsullarının tez-tez qəbulu da arıqlamağa mane olur. Bu məhsullar qan şəkərini sürətlə yüksəldir, daha sonra kəskin şəkildə aşağı salır ki, bu da acgözlük hissi yaradır və həddindən artıq yeməyə gətirib çıxarır. Həmçinin, qazlı və şəkərli içkilərin gündəlik rasionda olması çəkinin artmasına səbəb olur.

Gec saatlarda, xüsusən də yatmazdan 2-3 saat əvvəl yemək bədənə artıq kalori yığır. Bu zaman maddələr mübadiləsi yavaşladığı üçün qəbul edilən qida birbaşa yağ ehtiyatı kimi depolanır.

Yetərsiz su qəbulu da mühüm amildir. Su çatışmazlığı maddələr mübadiləsini zəiflədir, toksinlərin orqanizmdən xaric olmasını ləngidir və iştahı artırır.

Kifayət qədər yuxu almamaq hormon balansını pozur. Yuxusuzluq zamanı iştah artırıcı "qlrelin" hormonu yüksəlir, toxluq hissi yaradan "leptin" isə azalır.

Hərəkətsiz həyat tərzi də arıqlama prosesini əngəlləyir. Gün ərzində uzun müddət oturaq vəziyyətdə qalmaq, lift və ya avtomobil kimi rahat vasitələrdən istifadə, gündəlik yandırılan kalori miqdarını minimuma endirir.

Stress isə kortizol hormonunun artmasına gətirib çıxarır ki, bu da qarın nahiyəsində yağ toplanmasını sürətləndirir.

Qeyd edək ki, sağlam şəkildə arıqlamaq üçün balanslı qidalanma, müntəzəm fiziki aktivlik, kifayət qədər yuxu və stressin idarə olunması əsas şərtlər sayılır.