Alimlər müəyyənləşdirib ki, yaxınının ölümünə həddən çox pis olan insanlar daha tez ölür.

Milli.Az xəbər verir ki, Danimarkanın Orhus Universitetinin alimləri yası ağır formada keçirən insanların sonrakı on il ərzində vaxtsız ölüm riskinin iki dəfə artdığını müəyyən ediblər.

"Frontiers in Public Health" (FPH) jurnalında dərc olunan araşdırmaya 1735 nəfər cəlb olunub. İştirakçıların orta yaşı 63 olub və hamısı yaxın qohumlarını itirmiş şəxslərdir.

Tədqiqatçılar "PGD-13" adlı sorğu vasitəsilə iştirakçıların kədərə qarşı həssaslığını ölçüblər. Nəticələrə görə, dərin və uzunmüddətli yas keçirənlər növbəti on ildə digərlərinə nisbətən iki dəfə daha çox ölüm riski ilə üzləşir.

Aparıcı tədqiqatçı Dr. Mette Kjaergaard Nielsen bildirib ki, əvvəllər ağır kədərin ürək-damar xəstəlikləri, psixi pozuntular ilə əlaqəli olduğu sübut olunmuşdu. Yeni nəticələr isə bu əlaqənin daha ciddi nəticələrə yol aça biləcəyini göstərir.

Araşdırma zamanı həmçinin məlum olub ki, ağır kədər keçirən insanların əksəriyyəti artıq əvvəllər psixi pozuntu diaqnozu almış və müalicə almış şəxslər olub.

Alimlər xatırladır ki, ciddi psixoloji stress "qırılmış qəlb sindromu" (stressdən qaynaqlanan kardiomiyopatiya) yarada bilər. Bu hal adətən qəfil stress hormonlarının yüksəlməsi ilə meydana çıxır və ürəyin normal fəaliyyətini müvəqqəti zəiflədir. Belə vəziyyət infarkt simptomları ilə oxşar olsa da, arteriyalarda tıxanma olmur. Buna baxmayaraq, vəziyyət həyati təhlükə yarada bilər.