2025-ci ilin ilk 6 ayında ölümündən sonra orqanlarını bağışlamaq üçün müraciət edənlərin sayında artım var.

Bu barədə Teleqraf-ın sorğusuna cavab olaraq Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzindən məlumat verilib.

Bildirilib ki, cari ilin ilk 6 ayı ərzində ölümündən sonra orqanlarını bağışlamaq üçün müraciət edənlərin sayında nəzərəçarpacaq artım müşahidə olunur.

Mərkəzin məlumatına görə, xüsusilə, ölkədə ilk meyit donordan orqan transplantasiyası hadisəsindən sonra cəmiyyət arasında bu mövzuya diqqət və həssaslıq nəticəsində könüllü donor kimi qeydiyyatdan keçən şəxslərin sayı əhəmiyyətli dərəcədə artıb.

“Son ildə könüllü olaraq ölümündən sonra donor olmaq istəyənlərin sayı təqribən 300 nəfərdən yuxarı olub. Əvvəlki illərin göstəricilərinə əsasən, bu rəqəm təqribən 144 nəfər idi. Bu da göstərir ki, ölümündən sonra donor olmaq istəyənlərin sayı təxminən iki dəfə artıb”, - mərkəzdən əlavə edilib.

Qeyd edək ki, bu il Azərbaycanda ilk dəfə meyit donorun orqanları transplantasiya edilib. Meyit donordan götürülmüş qaraciyər 23 yaşlı xanıma, gözün buynuz qişası isə iki resipiyentə köçürülüb.

Bu əməliyyatlar yalnız ölkəmizdə deyil, həmçinin Qafqaz regionunda ilk dəfə meyit donordan alınan orqan transplantasiyası əməliyyatları hesab olunur.