Mövzümü olmadığı halda bazar və marketlərdə qarpıza rast gəlinir.

Bəs mövsüm gəlmədən satılan qarpızın orqanizm üçün hansı ziyanları ola bilər?

Mövzu ilə bağlı Redaktor.az-a açıqlamasında Qida təhlükəsizliyi Hərəkatının rəhbəri, sağlam qidalanma mütəxəssisi Məhsəti Hüseynova bildirdi ki, Azərbaycan üçün qarpızın xarakterik mövsümü iyul ayının ortalarından başlayaraq avqust ayını əhatə edir.

Onun sözlərinə görə, bu müddətdə yetişən qarpızlar daha təbii, qida dəyəri daha yüksək, eyni zamanda orqanizm üçün faydalı olur:

"Yaxşı olar ki, xüsusilə də həssas qrupdan olanlar azyaşlılar, xroniki xəstəliyi olanlar, hamilə və süd verən xanımlar məhz təbii mövsümdə yetişən qarpızları alsınlar.

Bir çox hallarda mövsümündən əvvəl də satışda qarpıza rast gəlmək olur. Bu, adətən ya xüsusi istixanalarda yetişdirilən qarpızlardır, ya da isti ölkələrdən gətirilən qarpızlar olur ki, bu məqamlarda da onların gətirilmə, saxlanma zamanı əgər hər hansısa xüsusi kimyəvi maddələrdən çox istifadə olunmayıbsa, bu şərtlə az miqdarda istifadə etmək olar. Ancaq qarpızın faydalı xüsusiyyətlərindən yararlanmaq istəyiriksə, bu, yerli mövsümü olan qarpızlardır".

M.Hüseynova qeyd etdi ki, qarpızın faydalı xüsusiyyətləri var:

"Qarpızın tərkibinin daha çox hissəsinin su olması, eyni zamanda vitamin və antioksidant maddələrlə zəngin olması nəzərə çarpır. A, C vitaminləri qarpızın tərkibində çoxdur. Likopen maddəsi var ki, bu da birbaşa olaraq orqanizmdə xərçənglə mübarizə apararaq qoruyucu xüsusiyyət daşıyır. Kalori dəyəri aşağı olduğuna görə qarpız asan həzm olunan qidalar sırasındadır. Lif tərkibli olduğu üçün həzm sisteminə faydalıdır. Bir çox hallarda sərinləşdirici qida kimi də istifadə olunur.

Süni şəkildə, istixanalarda yetişdirilən, kimyəvi maddə istifadə olunursa, bu zaman allergik reaksiyalarla yanaşı həzm sisteminin pozulması baş verir. Kimyəvi maddələrin çox olması zəhərlənməyə də səbəb ola bilər. Buna görə yaxşı olar ki, təbii mövsümündə yetişən qarpızlar qəbul olunsun. Əks halda digər qarpızlar hər orqanizmə fərdi, fərqli təsir göstərə bilər. Bu kimyəvi maddələrdən qaynaqlanan köp, şişkinlik, qarında ağrı və allergik reaksiyalar, səpki, qaşıntı müşahidə olunur. İnsulin müqaviməti olan insanlar, şəkərli diabet xəstələri miqdarı keçmədən qəbul etməlidirlər".

Mütəxəssisinin sözlərinə görə, qarpızı soyuq şəkildə qəbul etdikdə orqanizmə zərərli ola bilər.

"Həzm yolları və mədənin soyuqlamasına, iltihablanmasına səbəb ola bilər. Alarkən diqqət etmək lazımdır ki, vaxtında, təbii yetişdirilən olsun, çox iri olmamalıdır. Parlaq, qırmızı, naxışları tam aydın görünən, birbaşa olaraq günəş şüaları altında satılmayan qarpızlar daha yaxşı olar. Çünki uzun müddət günəş şüaları altında qaldıqda keyfiyyətini itirir. Bu da onun tərkibində müəyyən dəyişikliklərə səbəb ola bilər. Bunun isə sağlamlıq üçün fəsadları ola bilər", - deyə müsahibimiz yekunlaşdırdı.