Daxili xəstəliklər və romatologiya üzrə türk mütəxəssis, professor Dr. Mehmet Soy iltihablı revmatizmal xəstəlikləri olan şəxslərin oruc tutarkən ehtiyatlı olmalarının vacib olduğunu bildirib.

"Ölkə.az" xəbər verir ki, uzun müddət aclığın sağlamlıq üçün bəzi müsbət təsirləri olduğu elmi araşdırmalarla sübut edilib. Prof. Dr. Soy bu barədə belə deyib:

"Oruc çəki itkisindən tutmuş, insulinin həssaslığının artmasına, xolesterol və qan təzyiqinin azalmasına qədər bir sıra faydalar təmin edə bilər. Həmçinin, bəzi nevrodejenerativ xəstəliklərə qarşı qoruyucu təsir göstərə bilər. Son araşdırmalar orucun romatoid artrit, psoriaz (sədəf) romatizması kimi xəstəliklərdə müsbət təsirlər göstərə biləcəyini sübut edib".

Revmatizmal xəstəliklər yalnız oynaq və əzələləri deyil, eyni zamanda ağciyər, böyrək, dəri, göz və sinir sistemi kimi digər orqanları da təsir edə bilər. İltihablı romatizmalarda immun sistemi həddindən artıq aktivləşir və bu, orqanlara zərər verə bilər.

Uzun müddətli aclıq və immun sistemin reaksiyası

Prof. Dr. Soy orucun immun sistemə təsir edərək iltihab səviyyələrini azalda biləcəyini vurğulayıb:

"Uzun müddət aclığın immun sistemə təsiri var və iltihab mexanizmlərini tənzimləyərək iltihab səviyyəsini aşağı sala bilər. Romatoid artrit kimi iltihablı revmatizmalarda oruc tutmaq 3-4 aya qədər davam edə bilən müvəqqəti rahatlama verə bilər. Oruç zamanı iltihab göstəricilərində və oksidativ stress səviyyəsində azalma müşahidə edilə bilər".

Revmatizma xəstələri oruc tutarkən hansı tədbirləri görməlidir?

1. Dərman saatlarını iftar və sahura uyğunlaşdırın

Revmatizma xəstəliklərdə müntəzəm dərman qəbulu vacibdir. Dərman saatlarını dəyişdirmədən əvvəl həkimlə məsləhətləşmək lazımdır.

* Axşam qəbul edilən dərmanlar iftarda içilə bilər.
* Səhər dərmanları sahur vaxtına uyğunlaşdırıla bilər.
* Günorta qəbul edilən dərmanlar, həkim məsləhəti ilə iftara və ya sahura keçirilə bilər.

2. Kifayət qədər maye qəbul edin

Oruclu olarkən kifayət qədər su içmək çox vacibdir. Su çatışmazlığı oynaqlarda ağrıları artıra bilər. Buna görə iftar və sahur arasında ən azı 8-10 stəkan su içilməlidir.

3. Sağlam qidalanmaya diqqət edin

Revmatizma xəstələri üçün balanslı qidalanma mühüm rol oynayır. Xüsusilə antiinflamatuar (iltihab azaldan) qidalar tövsiyə edilir:

* Tərəvəz və meyvələr (xüsusilə A, C, E vitamini ilə zəngin olanlar)
* Tünd yaşıl yarpaqlı tərəvəzlər (brokoli, cəfəri, roka)
* Omega-3 mənbələri (balıq, çia toxumu, qoz)
* Doymamış yağlar (zeytun yağı, kətan toxumu)
* Ədviyyatlar (zerdeçal, zəncəfil, darçın, acı bibər)
* Qırmızı ət istehlakı azaldılmalı, şəkər və işlənmiş qidalar məhdudlaşdırılmalıdır.

4. Fiziki aktivlikdən imtina etməyin

Revmatizma xəstələri üçün müntəzəm yüngül idman tövsiyə edilir. Ramazan ayında da gündə yarım saat düz yolda gəzinti və evdə yüngül məşqlər faydalıdır.

5. Digər sağlamlıq problemlərini nəzərə alın

Əgər revmatizma ilə yanaşı ürək xəstəliyi, şəkər xəstəliyi və ya digər xroniki problemlər varsa, mütləq həkimlə məsləhətləşmək lazımdır.

Revmatizma xəstəlikləri olan bəzi insanlar üçün oruc faydalı ola bilər. Ancaq dərman qəbulu, maye istehlakı və qidalanma kimi əsas məsələlərə diqqət etmək vacibdir. Xüsusilə həkim məsləhəti olmadan oruca başlamaq tövsiyə edilmir. Sağlam bir Ramazan keçirmək üçün mütəmadi həkim nəzarətində olmaq və balanslı qidalanmağa diqqət etmək vacibdir.(Qaynarinfo)