Litvanın paytaxtı Vilnüsdə baş tutacaq NATO Sammitinə sayılı saatlar qalıb. Dünya səbrsizliklə Türkiyənin İsveçlə bağlı qərarını gözləyir. İsveçdə baş verən son qalmaqallardan sonra prezident Rəcəb Tayyib Ərdoğan son vaxtlar bu məsələyə mənfi münasibət bildirir.
Publika.az xəbər verir ki, görüşməyə saatlar qala Türkiyə Prezidenti Ərdoğan ilə ABŞ lideri Co Bayden arasındakı telefon danışığı dünya gündəminə oturub.
Məlumata görə, görüşdə Ukraynanın NATO-dakı mövqeyi, İsveçin NATO-ya üzvlüyü, F-16-ların çatdırılması və Türkiyənin Avropa İttifaqına (Aİ) tam üzvlük prosesi müzakirə edilib. Liderlər Vilnüsdə üz-üzə görüşmək və Türkiyə-ABŞ ikitərəfli münasibətləri və regional məsələləri ətraflı müzakirə etmək barədə razılığa gəliblər.
Prezident Ərdoğan İsveçin antiterror qanunvericiliyində dəyişiklik edərək düzgün istiqamətdə bəzi addımlar atdığını, lakin terror təşkilatı PKK/PYD/YPG tərəfdarlarının terroru təbliğ edən nümayişlər keçirməyə davam etdiyini və bunun atılan addımları puça çıxardığını bildirib. Türkiyənin F-16 tələbini İsveçin üzvlüyü ilə əlaqələndirməyin düzgün olmadığını vurğulayan Ərdoğan, bu yöndə verdiyi dəstəyə görə ABŞ prezidenti Baydenə təşəkkür edib.
Türkiyənin Aİ-yə üzvlük məsələsində prinsipial və dürüst olduğunu ifadə edən Ərdoğan, Aİ-yə tam üzvlük prosesini canlandırmaq istədiklərini, Vilnüs Zirvə toplantısında aparıcı AB ölkələri və Aİ rəhbərliyinin Türkiyənin üzvlüyünə açıq və güclü dəstək mesajı vermələrini istədiyini söyləyib.
Telefon danışğı haqda məlumat verən “Politico” bildirib ki, Ərdoğan-Bayden danışığı mənfi nəticələnib və “İsveçdə baş verənlər müdafiə ittifaqına qoşulma ümidlərinə mane olur”.
“Voa News” isə yazıb ki, hazırda İsveçin NATO-ya daxil olması mümkün deyil.
"Reuters" də görüş zamanı İsveçin NATO-ya daxil olmasının gündəmdə olduğunu qeyd edib. Xəbərdə Baydenin Ərdoğana İsveçin “ən qısa zamanda” NATO-ya üzv olmasını istədiyini ifadə etdiyi bildirilib.
Hadisəni işıqlandıran qəzetlər arasında Yunanıstan “City Times" nəşri də var. Xəbərdə İsveçin NATO-ya daxil olmasının gündəmin başında olduğu qeyd edilib.
Digər Yunan qəzeti "Kathimerini" İsveçin indi son mübarizəsini apardığını, lakin ABŞ və Baydenin Türkiyəni razı sala biləcəyini bildirib.
Görüş İsveç mətbuatının da gündəmində olub. Xəbərdə Baydenin “Gəlin bu işi bitirək” təkliflərinə baxmayaraq, Ərdoğanın müsbət rəy vermədiyi bildirilib.
Nəzrin
