Azərbaycanın estrada və opera müğənnisi (tenor), aktyor.
Rəşid Behbudov 1915-ci il dekabrın 1-də Tiflis (indiki Tbilisi, Gürcüstan) şəhərində anadan olub. Atası xanəndə Məcid Behbudov, anası isə Qazax rayonunun Yuxarı Salahlı kəndinin məhşur Vəkilovlar nəslindən olan Firuzə Vəkilova idi.
1933-cü ildə Dəmiryol Texnikumuna qəbul edilib və burada tələbələrin özfəaliyyət orkestrinin təşkilatçısı olub.
1944-1956-cı illərdə R.Behbudov Azərbaycan Filarmoniyasının, 1953-1960-cı illərdə isə Fikrət Əmirovun “Sevil” operasında (Balaş) və Üzeyir Hacibəylinin “Arşın mal alan” musiqili komediyasında (Əsgər) əsas partiyalarını ifa etdiyi Mirzə Fətəli Axundov adına Azərbaycan Opera və Balet teatrının solisti olub.
1945-ci ildə Üzeyir Hacıbəylinin eyni adlı operettası əsasında çəkilən “Arşın mal alan” musiqili filmində baş rolda çəkilib. Sonradan daha bir neçə bədii filmdə rol alıb.
O, bir çox böyük ümumdünya incəsənət məclislərində, beynəlxalq gənclər festivalında, xalqlar dostluğu konsertlərində, Bolqarıstan, Macarıstan, Polşa, Finlandiya, İngiltərə, Şotlandiya, Hollandiya, İtaliya, Fransa, Avstriya, Portuqaliya, Əfqanıstan, Türkiyə, İran, İraq, Suriya, Liviya, Hindistan, Misir, Efiopiya, Sudan, Ekvador, Peru, Argentina, Boliviya və s. ölkələrdə olmuşdur. Bir çox görkəmli bəstəkarların mahnıları R.Behbudovun ifasında dünya xalqlarının 50-dən çox dilində səslənib. R.Behbudov dünyanın məşhur ölkəsinə səfəri haqqında «Uzaq Hindistanda» kitabını yazır. 1954-cü ildə yenidən ekranda göründü — «Doğma Xalqıma» sənədli filmində, Azərbaycanın elə bir şəhəri və rayonu və kəndi yoxdur ki, sənətkarın ayağı oraya dəyməmiş olsun. Dünyanın hər yerində, bütün keçmiş sovet respublikalarında yüz minlərlə adam onun ecazkar səsinə valeh olmuşdur.
1957-ci ildə Azərbaycan Filarmoniyasının nəzdində caz üslubu və Azərbaycan xalq çalğı alətlərini birləşdirən konsert ansamblını yaradır və onun bədii rəhbəri olur (1957-1959).
1966-cı ildə R. Behbudov Azərbaycan mahnı teatrını (hazırda onun adını daşıyan) təşkil edir, son günlərinə qədər bu teatrın bədii rəhbəri və solisti olur.
Rəşid Behbudov 1989-cu il iyunun 9-da Moskvada dünyasını dəyişib. Bakıda, Fəxri Xiyabanda dəfn olunub.
